U İran kmaqwe u hayleyde bu madenho d’Suriya

U İran mşadarle grub mzayno hatho li mditho d’Albukamal dıknıflo bu madınho d’Suriya qariwo ma thume dcamu Iraq.

Mxasra hreto, Rusya kmarwıho ucdo i nuqaztayda d’Hmemim bu macırbo d’Suriya, bnişo dımşahılfola l’nuqazto folhoyto stratijikoyto laşana bu qlimo du madınho mescoyo kule ubu garbiyo d’Afriqya.

 İmşatasto da zedqe noşoye d’Suriya, mawdacla du İran mşadarle athmıl grub mzayno hatho mi hiğmonutho d’Hlob li fnitho d’Albukamal dıknıflo bu madınho d’Suriya, bnişo dmaqwe u haylo da nuqazyotho da grube bnayqyome du İran dkıtne frisi bu mathıbro d’Albukamal hula thume dkito camu Iraq. U grubano dıkqore ruhe “u grub d’Alhaj Qasem Sulaymani” mşataswo meqım kmo yarhe ba fenyotho d’Nubbol ud’Alzahraa dıknıfli bu garbiyo d’Hlob, ukmişakıl m’farsufe mzayne ma n’abne di duktho dkıtne ma Maşılmone Şica d’Suriya.

Lfuth a’mabuce dkıtla i mşatasto d’Suriya bi mditho d’Almayadin bu madınho dı Der Ezzor, u rişono du grub folhoyo d’Alşex dkıtyo masro cama noture qawmonoye du İran, mtayabwole yawme dı Tlotho dşaficina knuşyo cama rişone da caşıryotho Caraboye d’Almayadin. Bu knuşyano, u rişono du grub d’Alşex mawdacwole la hadire di mdabronutho da noture qawmonoye du İran hulale teklif laşan dsoyım qroyto la rişone da caşıryotho dımşatsi haylo sanodo la noture qawmonoye du İran, u mawdacwoleste du İran gdımqadım u snodo momunoyo u folhoyo la n’abne da caşıryotho Caraboye dkıtne ba fenyotho d’Almayadin ud’Albukamal.

Mxasra hreto, i sferyawmo mşamahto d’Alşarq Alawsat mawdacla da surotho dıgrişi ma satalayte, kmaglın d’Rusya ksaymo ucdo afulhone du terwiho di nuqazto folhoyto d’Hmemim dkıtyo qaruto mi mditho di Lathqiye bu macırbo d’Suriya. Lfuth Alşarq Alawsat, kito texmin rabo d’Mosko kıbco dımşahılfo Hmemim l’nuqazto du haylo oyaroyo stratijikoyo d’Rusya bu qlimo du madınho mescoyo kule ubu garbiyo d’Afriqya. Bu şıklano Mosko lıgıdfayşo sniqoyto dmıstacımlo a’nuqazyotho rahuqe dkıtla bu yamo Komo aw bi fnitho d’Sibirya, bnişo dsaymo cuqobe oyaroye bu yamo mescoyo uba fenyotho d’hedore.