10/03/2021

U İran krofıd i ithutho folhoyto dı Turkiya bu garbiyo du Iraq

U İran mawdacle dıkrofıd i ithutho folhoyto dı Turkiya bu garbiyo du Iraq.

 M’gabo hreno, 140 hadome bu mawtbo tahtoyo d’Amerika tlıblın mu rişono du athro Joe Biden dmımte l’qyomo rwiho u kamilo camu İran.

 U mcadrono dilonoyo du rişono du parlamento du İran dcala sebwotho emwothoye Husayn Amir Cabdıllahyan, makadle du athrayde krofıd i ithutho folhoyto dı Turkiya bu athro du Iraq.

Cabdıllahyan bi maqırhonutho dhule lu ajans d’Spotnik mırle “cıl mıdlıkmıtyaqnina dı Turkiya kıbco dmarwıho u haylayda bu Iraq, elo naqla hreto krıfdina dhowela Turkiya ithutho folhoyto bu Iraq”.

U İran u Turkiya kito qale baynothaye cal dkula ha ma tre athrawothani kobıc dmaqwe udmarwıh u haylayde bu Iraq u bathrawotho hrene bu madınho mescoyo baynothaye Suriya. U İran u Turkiya cıl mıdkıtlın awyutho b’ğalabe sebwotho, elo naqla hreto i qale dkito baynothaye cali morutho kmahwiyo li cayno b’şıkıl qriho. Bi harayto du yarho d’Şbot dşaficina, u İran u Turkiya qrewolın a’rişızgadwothaththe, cali mwatyutho dkito baynothaye bi sbutho di ithutho folhoyto dı Turkiya bu Iraq.

Mxasra hreto, 140 hadome bu mawtbo tahtoyo di kongre d’Amerika tlıblın mu rişono du athro Joe Biden dmisım qyomo rwiho u kamilo bi sbutho du nukler du İran. U froshezwo Amerikoyo d’ABC mawdacle di egartho dımşadro lu waziro di baroyutho Antoni Blinken, mdela acla 70 qoyume Qutnuthoye u 70 hrene mu gabo da demoqrat.

A’140 hadome du mawtbo tahtoyo, ktlıbi m’Biden dmımte l’menyono d’qyome camu İran bnişo dmitahıt qayde qaşye cali tahrazto du nukler uda soruhe Balistik du İran, udmınfıq mqabıl di siyase cjıqto dkımmaşyola Tahran bu qlimo du madınho mescoyo.

Bi egarthathe kmişalıtste bahro cala barmothoye Amerikoye dkıtne msike bu İran, ucalu snodo folhoyo dkımqadmole Tahran la grube mzayne d’Hizballa d’Lebnon ula Huthiye du Yeman ula grube mzayne bu Iraq, baynothaye hani dsımwolın u hçomo cala haylawotho Amerikoye ba şabe dşaficina.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…