U İran mahwele hfuxyo mqabıl du qyomo beyn d’İsroel u da İmarat Caraboye Mhayde

U mawtbo di methcadronutho du Xaliç krıhle atehdide du rişqutno du İran Hasan Ruhani lu athro da İmarat Caraboye Mhayde bi sbutho du qyomo du şlomo dımdela cam İsroyel.

Megabo hreno, i şultonutho d’İsroyel mawdacla dıkmıtyaqno du athro du Bahren u d’Cuman gdımhalqi cayni dawse dımhalqole u athro da İmarat.

U rişathro du İran Hasan Ruhani bu mamlo dsımwole lumıhreno, mawdacwole du athro da İmarat Caraboye Mhayde sımle fawdo rabo bu qyomo dımdele cam İsroyel, u mırwole ”i dawsathe xiyene la Maşılmone, lu camo Fleştoyo u l’Urışlemyo”.

Callathe, u mawtbo di methcadronutho du Xaliç tlıble mu İran dhowe masro cama prensibe d’Emwotho Mhaydotho dkıtne banye calu iqoro di morutho da nathrawotho, u dlımisım mudaxala ba sebwothathe agawoye. Bebzabno, u mawtbo di methcadronutho du Xaliç mahwele i awyuthayde cama İmarat mqabıl da tehdide dkowın cali morutho u cali mşaynutho dkul athro hadomo bgawıd mawtbo.

Megabo hreno, u waziro da sebwotho baroye da İmarat Anwar Qarqaş, mawdacle du qyomo dsımle u athrayde cam İsroyel fusqono di moruthoyo u latyo mqabıl du İran.

Athmılste, u athro da İmarat qrele u rişzıgado du İran dkıtyo bi erişkoyto d’Abu Zabi u maslamle egartho du protesto mqabıl du mamlo dsımwole Ruhani wu tehdidayde la İmarat.

Mxasra hreto, u waziro da nistixbarat d’İsroyel Eli Kohen mawdacle dıkmıtyaqın du athro du Bahren u di şultonutho d’Cuman gdımhalqi cayni dawse dımhalqole u athro da İmarat bi sbutho du qyomo du şlomo cam İsroyel.

Kohen bi maqırhonutho dhule lu frosqolo du gayso d’İsroyel mırle ”bıthır mu qyomo dımde cama İmarat, gıdmımde qyome hrene cam athrawotho du Xaliç u cam athrawotho hrene Maşılmone bi qıtca d’Afriqya”.