U Kenşo Emwothoyo kmahwe hfuxyo mqabıl du qrobo beyn d’Armenya u Azerbaycan

U kenşo emwothoyo kımdawım dmahwe ilo thınihuthayde mu qrobo dkımdawım da haylawotho d’Armenya u d’Azerbaycan bu qlimo d’Nagorno Qarabax.

 Baynothaye, Rusya dıtlıbla baroyo dmitakle u qrobo, Fransaste grışla u zuhoro calu qento du qedomo dı Turkiya bi sbuthathe.

 U mawtbo di mşaynutho d’Emwotho Mhaydotho bu buyono dıfrısle bu huthomo du knuşyayde athmıl, bıha femo tlıble baroyo dmitakle u qrobo dhani arbıco yawme kımdawım bayn da haylawotho d’Armenya u d’Azerbaycan bu qlimo şaryo d’Nagorno Qarabax dheş lımıctarıf bi şaryuthayde ruşmoyith m’Emwotho Mhaydotho.

Bu buyonayde, u mawtbo di mşaynutho tlıble ma tıre gabe dyıtwi bsurhobo la bazare, krıhle u haylo dıkmitıstacmıl bu qrobano u mahweleste u haşayde ma husrone di nafşo da mdinoye.

U rişwazire d’Armenya Nikol Paşinyan bi maqırhonutho dhule lu ajans Rusoyo dı Tas, mawdacle di şultonuthayde kdurşo ucdo bşıkıl jıddi dmitıctarıf ruşmoyith bi şaryutho du qlimo d’Qarabax, bnişo dmitarkuw u şlomo aminoyo bgawıd du athrano. Paşinyan mawdacleste dıkdurşi ucdo amkone dmişatıs koalisyon folhoyo u folitiqoyo camu qlimo d’Qarabax. Adyawmaste bi maqırhonutho dhule Paşinyan mzaharle mu qtolcamo taryono dkıbco Turkiya dsaymole bhaq da Armınoye.

Camgabıdathe, u malolo bışmıd du Kremlen d’Rusya Demitri Piskov, sımle qroyto l’Armenya u l’Azerbejan u la nathrawotho şorike bu qrobano dilonoyith Turkiya, dsaymi u mede dıknofıl aclaye, bnişo dmitaklın ataxtuşe u dmışre u krizano bdarbo folitiqoyo mşayno. Piskov mawdacleste da maqırhınwotho bi sbutho du snodo folhoyo, kmaqwın i nuro zıd bu qlimo d’Qarabax.

Megabo hreno, u rişqutno dı Fransa Emanuwel Macron mahwele ilothnihutho rabtho dkıtle mu qedomo dkıtla Turkiya bi sbutho du kriz d’Qarabax, u mzaharle dı Turkiya b’şıkıl dkibe qento u lomşalutho kımqadmo li sbuthathe. Macron bi maqırhonutho dhule l’Reuters mırle “u mamlo turkoyo du qrobo kımşaçıc Azerbaycan dkıbşo mehatho u qlimo d’Nagorno Qarabax, wu medano lıkmitaqbıl u laybe dmışfıc acle”.

Mexasra hreto, i Scudiye sımla qroyto l’Armenya u l’Azerbejan dmaklın ataxtuşe bu qlimo d’Qarabax, u dşorın u krizano bşıkıl mşayno lfuth afusqone du mawtbo di mşaynutho d’Emwotho Mhaydotho.