U Koalisyon Emwothoyo frısle istatistik mqabıl du ağuno d’Dacış

Bu istatıstik dıfrısle u koalisyon Emwothoyo dkıtyo bi rişonutho d’Amerika mahwele, du ağunayde mqabıl du tukoso marhıbono d’Dacış, heş kımdawım walaw law fayış dukotho bu duyoqayde.

 Ba buhonani dsımle u koalisyon mahweleste, du ağuno mqabıl d’Dacış bu Iraq kımdawım, elo u ağunano naqıs ışmo b’Suriya bi şato haraytathe.

U koalisyon Emwothoyo dıkmirayşın me Amerika frısle u istatıstik da cuqobe dıksoyım mqabıl da ğrobe marhıbone d’Dacış bu Iraq u bı Suriya u makadle, du ağunayde mqabıl du tukoso marhıbono heş kımdawım dılo kıloyo walaw Dacış law fayışle kontrol cal dukotho ba 2 athrawotho şbobe.

Bi maqırhonuthathe du koalisyon Emwothoyo mawdıcste, da cuqobe u da taxtuşe mqabıl du tukoso marhıbono kımdawmi zıttır bu Iraq me d’Suriya bi şato haraytathe. U koalisyon mawdacle, mu yarho d’Hziron dı şafıcina sımwo 26 cuqobe cala marhıbone u nafıqwo 89 naqlat taxtuşe cama marhıbone bu Iraq u bı Suriya.

Elo hol 75 ba mo da cuqobani du koalisyon bu yarho d’Hziron, cala marhıbone du Iraq simi u mtayıb belhude 6 cuqobe b’Suriya. Ba cuqobaniste qtılwo 20 marhıbone bu Iraq, 10 mcare, 3 maşıryotho u 13 dukotho du fyoşo d’Dacış. B’Suriya qtılwo 2 marhıbone u sımwo 5 cuqobe.

Gawonoyith bi maqırhonuthathe, mawdıc kımo cuqobe sim bkul yarho cala marhıbone wu husrono dıtrelın cal Dacış. Bebzabno, mqayıs u mınyono da cuqobe dsimi cala marhıbone bcayni yarhe bi şato da 2019 bu Iraq u bı Suriya u bu yarho d’Hziron da 2019, sımwo 33 cuqobe cala marhıbone ba 2 athrawotho.