U koalisyon emwothoyo mawdacle gmoyıd tedbire casye laşan dlomisım hçome calu bethtawso emwothoyo d’Arbil

U koalisyon emwothoyo mqabıl Dacış, mawdacle dgıdmadre kul tayisto dlo pilot dıkfayro lalcıl da thume du bethtawso emwothoyo d’Arbil.

Camgabıdathe, ahçome mqabıl da mraşhe kımdawmi bu zabno dımqarawle u siqumo da guboye gawonoye du Iraq.

U rişono du koalisyon emwothoyo mqabıl Dacış dkıtyo bu bethtawso d’Arbil Skott Disormo, mawdacle du koalisyon mucdo w’azolo gıdmadre kul şıkıl d’tayisto dlo pilot dıkfayro lalcıl du bethtawso d’Arbil dkibe haylawotho Amerikoye. Disormo mawdacle ste bi harayto du yarhano, gıdmitarku sistem di mudafaca laşan dmisım u sutoro di nuqazto du koalisyon dkıtyo bu bethtawso d’Arbil, ubıthır mathe gıdmıgroşo a’haylawotho dilonoye Amerikoye mi nuqazto.

Yawme d’Şabtho dşaficina, a’haylawotho Amerikoye madrewolın tarte tayisyotho İranoye dlo pilot dıhçımwolın calu bethtawso d’Arbil, wu malolo du koalisyon Wayn Marotto mawdacwole da hçomani qentone cala haye da mdinoye uda haylawotho dkıtne bu bethtawso. Bu yarho dı Tamız dşaficina sımwo hçomo bıhdo tayisto dlo pilot calu bethtawso d’Arbil, u meqım mene bıkmo şabe sımwo hçome b’tloth tayisyotho dlo pilot calu bethtawso d’Boğdod dkibe folhe Amerikoye.

U koalisyon emwothoyo latyo thnihoyo ma hçome haroye du İran dıksamlın b’tayisyotho dlo pilot cala şutose Iraqoye dkibın folhe Amerikoye udu koalisyon, cal da tayisyothani kibın dşıfci a’battariyat d’C- Ram di mudafaca dmahtila Amerika laşan dmisım u sutoro da haylawotho du koalisyon, mawxa ste Amerika kıbco dmarkıwo ucdo sistem hatho di mudafaca oyaroyto dlıkoe aftho la tayisyotho dlo pilot dşıfci macle.

M’gabo hreno, mçarıh tlotho farsufe bu furqoco d’radayto mlitho foqucwotho bu konvoy du qoyumo Iraqoyo dmeqım Muahmmad Aldayni bi hiğmonutho dı Diyala. Lfuth u ajans da tebe d’Boğdod, a’tlotho farsufani dlımagle cali hiyoyuthaththe mçarhi bu furqoco dhawi athmıl casriye, bu zabno dşafıcwo u konvoy du qoyumo catiqo mi qastra d’Bacquba. Aldayni mraşhoyo la guboye gawonoye du Iraq dıkmıntır dmisomi 10 bu yarho dı Tışrın u Qadmoyo dıbqamuthayna, wi tahrazto du qatlayde masırtoyo cama hayle dlıkıbci i şalyutho wi demoqratoyutho dmitarkıwo bu athrano.