U komisyon da galwoye d’Emwotho Mhaydotho frısle taşroro calu menyono da galwoye bıbritho

U Komisyon celoyo da galwoye d’Emwotho Mhaydotho, frısle taşroro calu mınyono da galwoye dkito bı britho. Bu taşrorano u komisyon m’akadle, bi şato da 2019 matiwo u mınyono da galwoye b’britho l’80 milyone dıbnaynoşo.

 Bu taşrorano dfris bu yawmo Emwothoyo da galwoye mawdıc, du mınyonano da galwoye, hawi rekord celoyo.

U Komisyon celoyo da galwoye d’Emwotho Mhaydotho-UNHCR frısle u taşrorayde di şato calu mınyono da galwoye dkito bı britho u mawdacle, dhol 9 milyone dıbnaynoşo jbiri ba 2019 dımgalwın ma dukothathe mcal fothe da krize uda qrobe. Ubu şıkılano, u mınyono da galwoye bı britho mati l’79 milyone 500 alfo bnaynoşo.

Bu taşroro dfrısle u komisyon bu yawmo Emwothoyo da galwoye dıknofıl adyawma-20 bu yarho d’Hziron mawdıc, dhol 80 milyone dıbnaynoşo galwoye’ne bu athrathe u 29 milyone 600 alfo mgalwelın lğer athrawotho wu qetrano kıxolıq ğamo rabo, cal d’mınyono nacimo d’galwoye kibın ducri la dukothathe.

Ban 1990, qadır’wo milyon u falge d’galwoye i şato, ducri la botathe. U mınyonano, nahıt ucdo l’400 alfo alfo i şato. U mşalo du komisyon Emwothoyo Filippo Grandi mawdacle, di sagiyoyutho da galwoye lıkmraçci galwoyutho ban athrawotho catire, elo ban athrawotho şbobe wu 68 ba mo da galwoye’ste me belhude 5 athrawotho’ne-Suriya, Venezuela, Afğanistan, Taymno d’Sudan u Myanmar/Burma.

Awkith, en dothe a krize dan athrawothani dmışrın, u şwolo da 68 ba mo da galwoye dı jbiri dmahzımi kibe dmışre. U mınyono da galwoye d’rakiwi bı athro tllithoyo, naqıs l’107 alfo bnaynoşo ma 163 alfo bi şato da 2016. Kanada mıdla dukthe d’Amerika, dmıstaqbela bu zyodo da galwoye.