U malolo du notarozo gawonoyo d’Emwotho Mhaydotho Stephane Dujarric, tlıble me Amerika ume Turkiya dhowın sanode lu terkiwo di şalyuthzayno b’Suriya

Bi maqırhonutho dhuwle athmıl u malolo du notarozo gawonoyo d’Emwotho Mhaydotho Stephane Dujarric li dafo d’Rudaw, sımle qroyto l’Amerika u l’Turkiya d’sundi u maşıqlo di şalyuthzayno b’Suriya bnişo dmitarkıw mşaynutho ba dukotho du garbay madınho d’Suriya.

Bu mamlo dsımle u mşalo Emwothoyo m’akadle, dmıstaqbelın b’thnihutho u ittifaq dhawi beyn di mdabronutho d’Darımsuq uda Haylawotho d’Suriya Demoqratoyto leşan i mlahmonutho d’QASAD beyn da haylawotho di mşaynutho du athro u dmitarkıw şalyuthzayno bu athro kule.

Dujarric mırle; Kıtlan sabro du ittifaqano dhawi, dsonıd u dımlabıb l’maşıqlo folitiqoyo kamilo dkıtyo lfuth a xtute wa prensibe di rmoyto da 2254 du Mawtbo di Mşaynutho d’Emwotho Mhaydotho u dıkfotıh qum du şekolo d’nomuso hatho, hiro u kino. Ubi sbuthathe, kıtla hem Amerika u hemste Turkiya dawro rabo.

U ittifaqano snid me athrawotho frişe; beynothaye’ste Turkiya dtlıbla dmitabqi a 8 nuqze dımbayni-xıd mathlo dmitaslımi botaytawso, dukotho du nafto wu duyoqo da thume l’Darımsuq. Elo camhbol walaw hawi u ittifaqano, Turkiya wa hayle noqfayda’ste kımdawmi a hçomathe cala dukotho d’QASAD bu garbyo d’Suriya ubi sbuthathe Dujarric m’akadle dan athrawotho dıkm’athri calu qlimano, klozım bi qamayto dhayri cala yuthrone da mdinoye.