U maşıqlo qamoyo du tecmiro di dayro d’Mor Quryaqus kamıl

U maşıqlo qamoyo du hethotho di dayro d’Mor Qıryaqos dkıtyo bu qlimo d’Batman b’Turkiya, kamıl.

 U maşıqlano dımdawamle hedor d’9 ışne, matın amasrafayda l’219 alfo dolare.

 İ karxutho di fnitho d’Bşeri bı Turkiya, mawdacla dkamıl u maşıqlo qamoyo du hethotho di dayro d’Mor Qıryaqos dkıtyo bi fnitho d’Bşeri bu qlimo d’Batman bu tayman madınho dı Turkiya.

U maşıqlano kmıhşuw ha ma tlotho maşıqle du hethotho di dayrathe dımşatsowolın a’Suryoye bu doro hmişoyo meqım 1600 ışne. İ dayro d’Mor Quryaqos kmişaklo mıtre taboqe dımşatsi b’gawıd d’wahdo du yurwayde 2500 mıtrowiye mrabce, uknıflo i dayrathe bi qritho d’Aranji cal sapthıd du turo d’Gira.

A’masrafe du maşıqlo qamoyo du hethotho di dayro d’Mor Quryaqos matın l’hedor d’malyun u 500 alfo Lirat Turkoye awkith 219 malyune dolare. Bu maşıqlano mhathıth u tarco rişoyo di dayro, i fotho tayımnoyto du benyono kule, i qelayto da bethqbure wa qeloyotho kulle du taboqo trayono.

Camgabıdathe, u maşıqlo trayono du hethotho di dayro d’Mor Quryaqos mşarele bıthır mi nyuhto du cedo du Ramadan, ubu maşıqlano gıdmihathıtho i cito u gıdmıbne u şuro di dayro wu falqo catiqo du wahdo di dayro.

İ karxutho di fnitho d’Bşeri bi maqırhonutho dhula lu ajans d’Anadolu, mawdacla du maşıqlo qamoyo du hethotho di dayro mşarewola meqım hedor d’9 yarhe, u mathkarla di dayro d’Mor Quryaqos gıdhuyo bıthır mu hethothayda qentrun ulsoyo ğalabe la socure, dilonoyith da Suryoye mıstacmewolın i dayrathe bu dacbar xıd qentrun ulsoyo di haymonutho.

A’fulhone du hethotho di dayro d’Mor Quryaqos kmisomi bi zdirutho dcamu qlimo d’Batman, camu şutoso dı Deqlath du quyomo, cami mdabronutho qlimoyto dilonoyto ucami mdabronutho di mardutho udu turist d’Batman.