U mathlono dı Danmark mırle Erdoğan Ganohoyo

Bu knuşyo du Mawtbo di Mşaynutho d’Emwotho Mhaydotho u waziro di baroyutho d’Danmark, sımle sturyo qaşyo u rişqutno dTurkiya Recep Tayyip Erdoğan bi sbutho du kboşo dan arcotho d’Suriya u ğer dukotho

 U waziro di baroyutho d’Danmark Anders Samwilson bi maqırhonutho dhule lu tboco froso, thımle Turkiya dkıtyo athro ganoho, u Erdoğan ganoho du qroboyo. U waziro tlıble mene d’baroyo dnofıq man arcotho d’Suriya, cal dlıkqathle lfuth u qonuno Emwothoyo u noşoyo dsoyım u mede dıksoyım ucdo b’Suriya.

Cali maqırhonuthathe, u mathlono d’Turkiya bu Mawtbo di Mşaynutho d’Emwotho Mhaydotho Fredon Sinerli bu mamlo dsımle mawdacle, du athrayde kibe dqotıc an esore diplomatiqoye camu Danmark. Elo bu funoyo dhule u mathlono d’Danmark mırle Ahna ksaymina baytoyutho l’2 mılyune u 30 alfo bnaymothoye Turkoye, u kımqadminalın b’şıkıl noşoyo xıd dkıtne bnaymothoye du athraydan, u ida dkıbcitu dı qutcitu anesorathxu u kul şıkıl d’esore acmayna, i naqlayo qıdritu dgurşitu a bnaymothoyathxu me Danmark dkowinalın moro u dkımqadminalın zedqe du hulmono u du yulfono b’şıkıl magon. Ahna athro mdinoyona u latna athro ganoho xıd Turkiya dkımathlitule hatu.

U mathlono d’Turkiya Sinerli bu hfuxyo dmahwele mşarele dımhawır b’gawe du Mawtbo di Mşaynutho d’Emwotho Mhaydotho, u kımsacır lu mathlono du Danmark bu leşono Turkoyo. Calathe u rişono du Mawtbo di Mşaynutho maklele i ytawto l’zabno d’30 qatinotho.

Bıthır ma duroşe dhawın, u mathlono d’Danmark rfıdle dıdocır naqla hreto dmıştawtıf li ytawto u mırle; Ono lıkbacno dmethkanaşno cam farsufo dkımathıl barbroye dıkqutli a nacime, a neşe wa gabre. Bıthır mathe griş kulonoyith mu knuşyano. A mathlone dan athrawotho d’Norweç, du Swed u d’Almanya hınneste grişi mi ytawtathe xıd awyutho cam Danmark.