U Mawtbo da Citotho d’Britho bu lumodaythe uharoyo mathkır b’rwihutho u qtolğenso dsımwola i mamlaxtho da Cuthmanoye cala came Mşihoye ban 1915

ATINA – Bu buyono du huthomo du lumodo dsımle u Mawtbo da Citotho d’Britho, awıl naqla grışle bi maqırhonuthayde u zuhoro calu qtolğenso dsımwola i mamlaxtho da Cuthmanoye calu camo Helen-Pontusoye. Bi maqırhonuthathe du Mawtbo da Citotho d’Britho-WCC, bha qolo mhaydo maslelın a hadire kulle u kboşo d’Turkiya cali gzırto d’Qufrus.

Bi maqırhonuthathe dsimo bu huthomo du lumodano’ste, maqbıl u renyo di cito Yawnoyto dhowe mawdyonutho kamılto u dmitathkıri a dıbhe du qtolğensano dsımwo cala Yawnoye, Suryoye u Armınoye bi şato dan 1915-dkıtyo cuhdono mahişono bu makthabzabno di noşutho cali barbroyutho qşitho dsımwo aclaye.

Camathe’ste bi maqırhonuthathe tlib şlomo u kinutho u mqadım sturyo l’Emwotho Mhaydotho dlo kıfulho makfıyono udu Mawtbo di Mşaynutho’ste latyo mawthrono bu tekliyo da qrob-xıd Ğaza, Ukraina, Sudan, Qarabax uğer. Calathe’ste xliq keşlo, a 2 tukosani a Emwothoye mıqa kibın dhowın organe du şlomo u di kinutho bbritho.

Bu buyono’ste u Mawtbo da Citotho d’Britho mhanele a fulhone dıkmaşın a citotho kulle b’britho leşan i xıdme du şlomo, du sutoro da zedqe noşoye ubu bnoyo d’kenşo qawro. U Mawtbo huwle şudoyo dgımdawım a fulhonayde leşan dhowe u qolo da Mşihoye u dnotır u sabro u şlomo d’britho kula.