04/07/2020

U Mawtbo da Neşe d’Suriya bi maqırhonuthı dsımle krıhle a fusqone du knuşyo d’Astana

U Mawtbo da Neşe du garbyo udu madınho d’Suriya, krıhle a fusqone dıfrisi bu buyono du huthomo du knuşyo ştithoyo dsim b’Astana beyn Turkiya, Rusya u İran.

 Bi maqırhonutho dıfrısle u Mawtbo da Neşe dkıtyo masro bi Mdabronutho yothoyto du garbyo udu madınho d’Suriya mırle; U knuşyo d’Astana, qento baroyoyo dkibe madcıf i mşaynutho i şalyutho du qlimo.

U Mawtbo da Neşe du garbyo udu madınho d’Suriya, frısle maqırhonutho lu renyo gawonoyo u krıhle eba a fusqone dmidi bu knuşyo ştithoyo dsımla Turkiya, Rusya u İran bi arişkoyto d’Kazakistan-Astana cali aykanoyutho harayto du kriz d’Suriya.

Bi maqırhonuthathe mawdıc u şıkıl du leşono dmıstacmıl bu buyono du huthomo du knuşyano d’Astana qento tahdid baroyoyo dilonoyith li mşaynutho uli şalyutho du garbyo udu madınho d’Suriya u gawonoyith la qlime d’Suriya kulle u calathe tlıble u Mawtbo da Neşe, dmıtrıd u buyonano d’Astana.

U Mawtbo mırle; U buyono fris bı maşıqlo ğalabe kritik du kriz d’Suriya u kıtle tathir rabo cala bnaymothoye du athro kulle dhzelın casqutho rabtho mu qonuno d’Qaysar. Calathe i netije du knuşyano kmifaşqo şuşoto u tahdid rabo ma rişone du İran, d’Turkiya udı Rusya dhiw bı zabno da 3 athrawothani klozım dımqafın şroyo li aykanoyutho du momuno d’Suriya ula haqle hrene du kenşo.

Bi maqırhonuthathe u Mawtbo da Neşe grışle u zuhoro cala hjome ucala hawbe noşoye dıksaymi a hayle kaboşe d’Turkiya leşan u şuhlofo demoğrafoyo du qlimo, i siyase cjıqto dıkmaşyo Ankara, u şuhlofo da zuze wu dyoşayda cali morutho ucali şaryutho d’Suriya. Tlibste mu koalisyon Emwothoyo dmoyıd i mşaluthayde u dmakle a hjomani d’Turkiya calu garbay madınho d’Suriya.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…