U Mawtbo da Senatore d’Fransa mawdele bi şaryutho d’Nagorno Qarabax

U mawtbo da senatore d’Fransa mayadle i rmoyto dıktulbo mi şultonutho dmitıctarıf bi şaryutho du qlimo d’Nagorno Qarabax.

 İ rmoytathe dımaydo mi sagiyutho da qole da senatore Franşoye, krıhlaste u hjomo bceldboboyo dsim me Azerbaijan u me Turkiya calu qlimo d’Qarabax, u sımle qroyto dmıgroşi a hayle d’Azerbaijan mu qlimo.

 U mawtbo da senatore d’Fransa bu quwolo dsımle adyawma, mayadle i rmoyto dıksaymo qroyto li şultonutho d’Paris dmıctrafo bi şaryutho du qlimo d’Nagorno Qarabax dkıtne i sagiyutho da comurayde Armınoye. İ rmoytathe dlayba djıbro i şultonutho dmaftole la haye, mayıd me 305 hadome bu senato dı Fransa dkıtne bi sagiyutho yaminoye saqıbloye, mqabıl d’balhude ha qolo dmırle lo, u 30 hadome hrene dlulın qolaye.

İ rmoytathe dımaydole u senato d’Fransa, krıhla uhjomo bceldboboyo dsımle u athro d’Azerbaijan calu qlimo d’Qarabax, bu snodo di şultonutho d’Turkiya u marhıbone nuxroye, ubebzabno sımla qroyto dmıgroşi a hayle d’Azerbejan ma fenyotho dımvayaclın an Armınoye bu qrobano dımşarewole 27 bu yarho d’İlıl dşaficina.

Camgabıdathe, irmoyto sımla qroyto li şultonutho d’Paris dsaymo u mede dıknofıl acla, bnişo dmitabdın a bazare bu taro du grub d’Minsk, u dmiqafe şroyo aminoyo lu kriz d’Qarabax dıksoyım u garanti dmitarkıwi athume lfuth u qyomo dan 1994. İ rmoyto mşajaclaste i şultonutho d’Fransa dfılho leşan dmıfrıs hayle Emwothoye bu qlimo d’Qarabax, bnişo dmisım u sutoro da comure, u dmiqadım mcadrınwotho noşoye rabe la mdinoye.

U mawtbo da senatore dı Fransa bi rmoytaydeste sımle qroyto l’Paris dıtılbo dmisım buqore Emwothoye cala gunhe du qrobo dsimi b’Qarabax. Bi ytawtathe, u rişono du koalisyon da Qutnuthoye senator Bruno Ritayo sımle hjomo qaşyo cali mıştawtfonutho d’Turkiya bu qrobo d’Qarabax.