U Mawtbo da Tawdiyotho uda Hayminwotho du garbiyo u madınho d’Suriya krıhle u hçomo marıhbono dsim cali cito d’Mor Alyas

ZALIN, Beth Nahrin – Bhaq du furqoco marıhbono dsim bi cito d’Mor Alyas bı Darımsuq, u mawtbo da tawdiyotho uda haymınwotho du garbiyo u madınho d’Suriya frısle adyawma buyono lu ray gawonoyo dıbritho dıqre mi hadımto bu mawtbo di athto du lumodo Maşılmono demoqratoyo Kinda Kancan. 

Bu buyono dıqre, kmisım qroyto dmiqadım xıd gunho lkul mamlo dkımşaçıc li bcedlboboyutho, ukmisım ste qroyto laşan du sutoro da dukotho uda bote di cabade, udmimıd hşowo ma hayobe dkıtne mşale calu furqoco di cito, bnişo dmişarrıro i kinutho, udlımisım tekrar hawxa gunhe dkımhadıdi i mşaynutho du kenşo.  

Kancan bi maqırhonutho dhula lu ajans da tebe d’Syriac Press mırla “ahna xıd neşe b’gawıd du mawtbo da tawdiyotho uda haymınwotho du garbiyo u madınho d’Suriya, kıkırhina u hçomano u marıhbono dsim cali cito d’Mor Alyas bı Darımsuq, ukım’akdina du gunhano hçomo dkıtle u nişo d’zorıc balhude i fıtneyo. Ahna ahunonena. Şlomo li ruho da sohde u hulmono la mçarhe. Ukımmina u haşaydan hayoyo, wi wolithaydan mşawtaftoyo”. 

M’gabo hreno, i mşalonitho du Huyodo da Neşe Suryoye bi mditho d’Qamışli Jozafin Sawme bi maqırhonutho dhula, sımla qroyto dmimıd hşowo ma hayobe, u makadla di kinutho qonunoyto klozım dmişarrıro, bnişo dmınfıq moro li mşaynutho gawoyto, ula zedqe da yaqrotho da sohde. 

Mxasra hreto, i hadımto du mawtbo da tawdiyotho uda haymınwotho Manal Şexmus bi maqırhonutho dhula l’Syriac Press mırla “u furqoco marıhbono di cito lıkmitaqbıl lo mayna tawditho aw haymonutho awste qonuno. Ukım’akdina ste i awyuthaydan cama n’ahunonaydan ucama şorikaydan du athro. Husoyo li ruho da sohde, u hulmono msarhıbo la mçarhe”.