U mawtbo folhoyo d’Sweda rfıdle mşale d’Darımsuq

SURIYA – U mawtbo folhoyo d’Sweda bu buyono dıfrısle lu tboco froso, krıhle u qedomo dhın ma grube mzayne dmacbarlın menyono ma haylawotho di mşaynutho di şultonutho zabnoyto dı Darımsuq li mditho d’Sweda, u mırle “athmıl safrayto hın ma grube mzayne mcadarlın i Sictho dı Tahrir Alşam dmacbarla menyono ma haylawothayda li mditho d’Sweda, dlo sdirutho camu mawtbo folhoyo, aw camu kenşo gawoyo awste cama sicotho tawdithoye di mditho”. 

U mawtbo folhoyo d’Sweda dıkrıhle u qedomano dı Darımsuq, makadle ste dıkrofıd i şalitutho di şultonutho zabnoyto du maşıqlo folitiqoyo hatho d’Suriya, u mawdacle di şultonuthathe lıkımgaşmo a’nişe dkıtle u camo d’Suriya, mawxa ste layto mkone dmiatqıblo xıd şultonutho bayn şartat aw celotho dhowe. 

Bebzabno, u mawtbo folhoyo d’Sweda mzaharle kul man dkımnase dhowela i şultonutho zabnoyto dı Darımsuq şalitutho cali mditho d’Sweda ucala n’abnayda, u mawdacle du qedomano dı Darımsuq gıdmamte camruhe netiçe d’noşo dlıkobacla, ubebzabno gdımhadıd i mşaynutho gawoyto d’Suriya. 

Bu huthomo du buyonayde, u mawtbo folhoyo d’Sweda makadle dgıdhowe şuro mqabıl dkul haylo dkımnase dımharhız i şalyutho wi mşaynutho di fnitho.