Emwotho Mhaydotho mathkarla u yawmo tibeloyo da neşe, d’8 Odor

NEW YORK – U taşroro dıfrısla adyawma Emwotho Mhaydotho kımşalıt bahro cala zedqe da neşe ucali şawyutho bayn da tre ğense, ukmawdıc d’ha ma n’arbıco sahme da şultınwotho dıbritho mhalaqlın dawsat laxalf bi sbutho da zedqe da neşe bi şato dşaficina da 2024. 

Cıl mdımhalıq dawsat msimone bi sbutho du yulfono da bnotho uda mkone di methtaksonutho di iqartho, elo naqla hreto u taşroro d’Emwotho Mhaydotho dkımcaqbo a’sebwotho di şawyutho bayn da tre ğense udu teqwiyo di athto komır “bi şato dşaficina qtil athto aw bartho kul 10 qatinotho mi xasra du şorikayda yaste m’farsufo mi iqartho. Bebzabno a’gunhe du cnufyo ğensoyo dkıtne masre cami qale b’gawıd di iqartho zayidi 50% mi şato da 2022”. 

U taşroro emwothoyo dıfris meqım mu yawmo tibeloyo da neşe dıknofıl yawme d’Şabtho dıbqamuthayna, mawdacle ste dbalhude 87 athrawotho dıbritho mdabri m’athto. 

U notarrozo gawonoyo d’Emwotho Mhaydotho Antonio Guteres bu buyono dıfrısle mırle “tibeloyith a’zedqe da neşe kmıhçım aclaye. Mdarbıd dmıfroso i şawyutho bayn da zedqe du garbo udi athto, khozinna dıkmıfroso i bceldboboyutho mqabıl da neşe”. 

Guteres bu buyonayde, mawdacle dıklozım britho kul b’şıkıl çıddi dıtrıyo a’zedqe noşoye wi şawyutho wu teqwiyo di athto dhowın şrorutho laşan da neşe uda bnotho kulle ulaşan kul noşo bkul duktho.