U Mawtbo Folhoyo d’Sweda thımle a’haylawotho haçome bu dyoşo di şalyuthzayno

SWEDA — U rişono du mawtbo folhoyo d’Sweda Tareq Alşufi bi maqırhonutho dhule l’Hawar News cali aykanoyutho ducdo mırle “i aykanoyutho folhoyto b’Sweda heş latyo mşayanto. A’haylawotho haçome lıffayişi masre cami şalyuthzayno, wa hçome dsımilın cala mdinoye dkıtne ba qıryawotho dıknıfli calu xtuto du gbino du qrobo mthabtene bu qolo ubi surto”. 

Alşufi bi maqırhonuthayde tlıble mu kenşo emwothoyo dmazıd u hbosayde cala haylawotho haçome laşan baroyo dmaklın a’taxtuşe, u makadle ste dımqadım menyono dı taşrore la sicotho emwothoye calu qtolcamo mtakso dsim bhaq da Druz, da Mşihoye uda qalilwotho hrene, u acme ste a’msoke wa icdame dıkmisomi la mdinoye dkıtne m’ğer madhhabe u tawdiyotho. 

Bebzabno, Alşufi sımle qroyto lu kenşo emwothoyo dıtocın i mşaluthayde udsoyım hboso cali şultonutho d’Suriya, laşan baroyo dgurşo a’haylawothayda mi hiğmonutho d’Sweda, u tlıble ste ma şutose du tboco froso dnıqli i şarirutho udımthabti u haşo noşoyo dıkcayşole Sweda cal idothıd da haylawotho tuhmonoye udi şultonutho. 

U rişono du mawtbo folhoyo d’Sweda Tareq Alşufi bu huthomo di maqırhonuthayde mırle ste “adyawma Sweda mditho d’haşo yo. Layto eba a’şartat da haye, u mtawaqtoyo mkul xasra. I bethkrihe ste athronoyto mawqıdo u mahırwo, uksaymina qroyto dmitacbır b’surhobo mcadrınwotho noşoye udu hulmono”.