U Mawtbo Umthoyo d’Bethnahrin komhaydır u yubolo da 25 eşne di ruşmoyuthayde

BETH NAHRIN – U Mawtbo Umthoyo d’Bethnahrin-MUB d’zrici a şerşayde bu falqo d’Turabdin  d’Bethnahrin, frisi ba falqe du athro kule uban athrawotho di golutho. MUB dımşarewole ba slogane dcoro lu athro! Hubo, hdoyutho, haylo u hirutho mtakasle ruhe beyn du cameydan wi dawse qamayto du dcoro dlu athro mhalqowa xıd haylo folhoyo dhuwola sabro hatho lu cameydan dkull duktho.

Wu hawxa ba 20000 sim u lumodo qamoyo ba turone d’Bethnahrin u dımhalqo i dawse ruşmoyto di gaboyutho du ağuno di hirutho du cameydan. Cali şetısto du lumodano adşato u Mawtbo Umthoyo d’Bethnahrin mhaydarle yubolo da 25 eşne leşan dımhage bi ruho celoyto u ağuno di hirutho du cameydan cama gabe u şutose du cameydan. Bu yuboloano dgımisım 8 bu yarhano-yawme d’Huşabo gıdmiqadım mamle ma şutose d’MUB umi rişonutho d’Mawtbo.

Bebzabno gıdmitahwe darbo la gabe u şutose kulle dkıtne hadire dımqadmi mamlo cal ışme da gabathe uda şutosathe. A omure du cameydan gımdqadmi mimre calu yubolano wa zamore du yawmo’ste gımqdmi zmirotho la hadire. Lu yubolano maczmi mothonoye u mathlone ma gabe u şutose du cameydan uda came dıkhoyina beynothaye u hın folitiqore ma gabe d’Urifi.

U yubolano dkıtyo da 25 eşne da fulhone dsimi bi rionutho du Mawtbo Umthoyo d’Bethnahrin ftıhlın tarco qum di siyase du cameydan u dımşatıs timoyotho u şutose mşahılfe xıda şutose du tbocofroso, a şutose folhoye, marduthoye, yulfonoye udu diplomatiqoye u ğer. Lu yubolano gıdmıştawtfi a gabe u şutose du Mawtbo Umthoyo d’Bethnahrin dkıtne b’Lebnon, bu Ciraq, b’Suriya, b’Turabdin.

Uma athrawotho di golutho bşıkılat mşahılfe lfuth a mkone dkito. Bu dumyano u Mawtbo Umthoyo d’Bethnahrin kımcayıd u yubolo da 25 eşne dımşatıs u ksoyım qrayto di aminutho du ağuno di hirutho du cameydan u dımdawmina d’tulbina a zedqe du cameydan ba falqe du athraydan Bethnahrin.