U mdabrono gawonoyo du yulfono Suryoyo Cimad Salem Jajjo mıstaqbele taşdarto mu komisyon celoyo da zedqe noşoye du Iraq

U mdabrono gawonoyo du yulfono Suryoyo Cimad Salem Jajjo, mıstaqbele bu makıthbayde b’Boğdod, taşdarto mu komisyon celoyo da zedqe noşoye du Iraq.

Bi ytawtathe d’drişo eba i aykanoyutho du yulfono Suryoyo bu Iraq, hiwste mawdconutho li taşdarto calu menyono da yolufe du camaydan uda madraşyotho dıkmitaqre ebaye u leşono Suryoyo wi tarbitho Mşihoyto.

Taşdarto mu ferco da qalilotho dkıtyo masırto bu makıthbo du duyoqo du komisyon celoyo da zedqe noşoye bu Iraq, sımla socurutho lu qentrun di mdabronutho gawonoyto du yulfono Suryoyo b’Boğdod, u mıstaqıblo mu mdabrono gawonoyo Cimad Salem Jajjo. İ taşdarto kmişaklowa mu mşalo du ferco da qaliltho Cbed Cabdalla, uma hadome du ferco-Cadnan Nahi u Rana Muqbıl.

Bi ytawtathe, i taşdarto du komisyon celoyo da zedqe noşoye mıdla mawdconutho cala fulhone dıksaymo i mdabronutho gawonoyto du yulfono Suryoyo, u maslım ela istatistike dilonoye calu menyono da yolufe du camaydan dıkqorın ba madraşyotho du Iraq, u istatistike hrene calu menyono da madraşyotho dıkmitaqre ebaye u şbilo du leşono Suryoyo udi tarbitho tawdithoyto Mşihoyto.

Bebzabno, Jajjo hule mawdconutho cala şutose u qentrune du yulfono Suryoyo, a mdabronathe, ucalu tboco da kthowe du şbilo du leşono Suryoyo udi tarbitho Mşihoyto. Mxasra hreto, i taşdarto du komisyon celoyo da zedqe noşoye du Iraq mqalasla a fulhone wu dawro dıkmıştacyo i mdabronutho gawonoyto du yulfono Suryoyo wa falohayda, leşan u şuşoto du tewlifo du leşono Suryoyo wi tarbitho Mşihoyto.