U mraşho du ğbino camoyo li rişqutnutho d’Turkiya Kemal Kılıçdaroğlu hawi

ANKARA – Bıthır mıd i rişonitho du gabo d’İyi Meral Akşener dmawdacwola dnafiqo mu ğbino camoyo da 6 gabe, a droşo siyasi şahini b’Turkiya.  Ba yawme haroye a mşale da gabe, wa mfaşqone siyasi hulın a hzayothathe mın gıdhowe, wu Gabo d’İyi man gıdsonıd ba ğuboye dıgdowın 14 bu yarho d’İyor. 

Elo adyowma ba şoce d’safrayto Meral Akşener hawila ytawto cama rişone da karxwotho d’Ankara udı Stanbul dkıtne mu Gabo qutnuthoyo du Camo CHP Ekrem İmamoğlu u Mansur Yavaş.   

Bıthır mi ytawtathe a 3 mşale hawilin ytawto camu rişono du gabo d’CHP Kemal Kılıçdaroğlu. U hawxa mşarelın a droşe Meral Akşener gıdmıştawtıfo lu knuşyo dıgmitahwe fusqono ma 6 gabe, Kemal Kılıçdaroğlu gıdminaqe mu ğbino.  

U knuşyo dımşarewole bıthır me falge d’yawmo khalıs bıthır 4 şuce. Wu rişono du Gabo d’Saadet Temel Karamollaoğlu bu mamlo dsımle lu camo dlatımwo qumu bınyono du gabo, mawdacle u rişono d’CHP Kemal Kılıçdaroğlu hawi u mraşho di rişqunutho mu taraf du ğbino camoyo.

Kılıçdaroğlu bu mamlo dsımle lu camo mırle “Ahna nafıqina lu darbo leşan dmalımina a gawne du athro kulle cal hdo sıfro.” Mawdacleste, a rişono da gbe dkıtne bu ğbino camoyo gıdhowen a mcadrone du Rişqutnu.

Bu zabno du knuşyo layımwo ba alfowat d’camo dnıtriwo a ışto gabe dımraşhi u farsufo dıgminaqe rişqutno.