U Hudro da Neşe d’Turabdin-Surkadim, mathkarle u Yawmo da Neşe Falıhyotho dı Britho 8 Odor

TURABDİN – A hadımyotho du Hudro da Neşe Suryoye b’Turkiya Surkadim bi tahrazto dımbayanlın, sımlın bi qamayto socurutho li iqartho du claymo Suryoyo dımhasewo bu zulzolo dhawiwo b’Adıyaman, u bıthır la neşe di qritho d’Midın u d’Bsorino u hawi droşo; mahkelın cali mıcne du yawmano u cali olsoyutho dkito dmitathkır kull şato. Bebzabno mqadım lkull athto u claymtho dkıtwın hadire bi hfituthathe wardo. 

Ba yawmotho dıbqamuthayna’ste, u Hudro da Neşe Suryoye, gıdsoyım socurwotho la neşe du camaydan d’Kafro, Arkah u Hah. HNB m’akadle cali celtho di athto Othuroyto-Suryoyto hani ışne kımcaydo u yawmano d’8 Odor b’hfitwotho mşahılfotho u knufqo moro lu yawmano bi ruho ubu mrodo leşan dhowe demoqratoyutho u şawyutho bı britho.   

HNB gıdsoyım bi mdito d’Giessen 11 bu yarho taklitho bi cohnutho d‘8 Odor, bu athro d’Swisra gıdmisım 11 bu yarhano hago ubu Swed‘ste gıdmisım 12 bu yarho d’Odor turgomo calu dawro di athto bgawe du kenşo, u bcayni yawmo, gıdmitahwe turgomo b’Bruksel mu Institut d’Bethnahrin mşawtıfo cami cito Kaldoyto.  

Ba yawmotho dşafıcinaste, i Mtakasto da Neşe d’Bethnahrin du Cıraq sımla hfitutho rabtho bi mdito d’Bağdede, u Huyodo da Neşe Suryoye b’Suriya bi Gozarto mathkarle u yawmano, u HNB d’Urifi’ste mtayabwole hago  b’Gutersloh u Paderborn d’Almanya cbi cohnutho da hfitwotho d’8 Odor u yawmo Tibeloyo da Neşe.