U mraşho du gbino Camoyo li rişqutnutho Kemal Kılıçdaroğlu yatu cama rişone zawgoye du Gabo Demoqratoyo da Came HDP

ANKARA – U rişono du Gabo di qutnutho du Camo CHP wu mraşho di rişqutnutho du gbino Camoyo Kemal Kılıçdaroğlu wa rişone zawgoye du Gabo Demoqratoyo da Came HDP  Pervin Buldan u Mithat Sancar sımme ytawto bu bınyo du Parlamento.   

Bıthır mu knuşyo dı grışle şuctho, a tlotho rişone hulın maqırhonutho lu tboco froso. Kemal Kılıçdaroğlu dsımle u mamlo qadmoyo mawdacle, i siyase klozım dmitawfıqo m’wahdo di qale, u klozım dmişahlıfo l’wahdo du qefoyo du şuryono. Kılıçdaroğlu dım’akadle u sistem du Qayyum lıkhızzale mcadlo ba melani mdawamle ”hano dkothe ba guboye ba guboye gıdızze. Hano u qonuno asasi di demoqratoyuthoyo.”  

Kılıçdaroğlu dımbayanle hınne mqabıl du sxoro da gabene u mawdacle, klozım u sxoro da gabe dmisım casqotır. Mathkarle a şwole kulle beynothayye u şwolo da Kurdoye u adres du şuryonayde u Parlamentoyo. Kılıçdaroğlu dsımle sturyo i sbutho du leşono Kurdoyo dıkşocıf ba protokole du parlamento d’Turiya xıd leşono dlıkmidıc mırleste ” TRT kıtle kanal kurdoyo. Bu parlamento aydarbo kıthwitu hano leşono dlıkmidıcyo. Li dawle lıkmalıq qdomo bı’tarte fthotho.”   

A rişone zawgoye d’HDP Pervin Buldan u Mithat Sancar mawdacce cal di duktho du şuryono da şwole u parlamentoyo mawxa iytawto sımolın bu parlamento. Buldan bi maqırhonutho dhula mırla ”mığelan cala şwole asasi d’Turkiya u cali ntırto dkıtle u camo menayna.” 

Sancar’ste bu mamlo dsımle mawdacle kımyaqri i socurutho d’Kılıçdaroğlu u  mıre ”sımlan ytawto dkıtyo banayto. Kmıtyaqnina klozım tahrazto msarhabto leşan dmıbnına bote du camo dıhzelın husrono. Kito sniqutho l’şuroyo hatho. Wu medano kibe dhowe dmişakıl  haye u sistem demoqratoyo, da zedqe noşoye, di kinutho udi hirutho” A rişone zawgoye mawdacce gıdırşi cama hayle du gbinaththe, u bgawıd d’yawmo u tre gıdmitawdıc lu tboco froso i netije dımotın bi sbutho da guboye di rişqutnutho.