U Papa gıdsoyım socurutho lu Daşto d’Ninwe

U tbocofroso d’İtalya kımşalıt bahro cali socurutho dgıdsamla i qadişutho du papa Mor Fransis Qadmoyo lu athro du Iraq, dilonoyith li mditho Suryoyto d’Bağdede di daşto d’Ninwe.

 İ sferyawmo d’Roma Ripoters, bu taşroro dıfrısla mawdacla di socurutho dgıdsamla u papa l’Bağdede, kmadilo du camo Kaldoyo-Suryoyo-Othuroyo b’sebyono kamiloyo dımdawım dfoyış bu cafrano.

 Sfaryawmo İtaloyto, frısla taşroro dımşalıt bahro cali socurutho dıgsoyım u Papa Mor Fransis Qadmoyo lu athro du Iraq, u calu nişo dkıtle bi socuruthathe wi egartho dıgtocın la Mşihoye du athro. U taşroro cal leşone dıha ma kohne Iraqoye, mawdacle di socuruthathe gıdhuyo funoyo lkull man dıkmıtyaqın di yarcathe dılo timo fayişo.

İ sfaryawmo İtaloyto mathkarla du Papa Mor Fransis gıdızze lu Ciraq beyn 05 uhul 08 bu yarho d’Odor dıbqamuthayna, ume beyn da gedşe rabe dgıdhowın i socurutho dgısoyım u Papa li mdito Suryoyto d’Bağdede di daşto d’Ninwe’yo.

Sfaryawmo kımmo; İ mdito d’Bağdede kiba u menyono celoyo dkulle da Mşihoye dıkhoyın bu Ciraq. B’Bağdede bi şato da 2014, jbırwolın a marhıbone a comurayda-dıkmotewo u menyonaththe 50 alfo farsufe dmahızmi mi mdito.

Qaşişo George Yahula dıkmtayıb i socurutho du Papa l’Bağdede, bi maqırhonutho dhule mırle; Bağdede kmabrıqo ucdo. bu şuroyo dkulle umeqım me kull mede Bağdede ba bnaymothoyayda kmabrıqo ba bote dıbnın me hatho, u dıkmadili calu quyomo ucalu sebyono du fyoşo du camo bi arcayde.Mawdıc’ste du qaşişo George kull naqla krohım dımşamıh i mdito bu ışmayda u Suryoyo Oromoyo catiqo d’Bağdede awkith lıkobıc dmıqroyo Qaraqoş.

Qaşişo George mırle’ste; Tamo bi socuruthayde l’Bağdede, u Papa gıdşomıc a teşciyotho da sohde uda gabore caşine. İ socuruthathe leşanayna insiyativ du şeçoco’yo, u egartho’yo l’more da lebawotho mhile dıkmıtyaqni du cafrano haw fayışle timo. İ qadişutho du Papa kobıc dmaqım u athrano cal hayle ucama noşe dkito bu cafrayde.