28/01/2021

Mbayın dımşawhır u zabno du Bethdino d’Dayroyo Aho Bilecen

U bethdino du dayroyo d’Aho Bilecen kımdawım, u kmidawım dmıthım dımcadarle tukoso marhıbono.

 I dacwa athayto du dayroyo, mbayın dımşawhıro lu yarho d’Nison.

Ba cuqobe dsımiwo bu siqumo d’9 Konun u haroyo da 2020 ma hayle di mşaynutho d’Turkiya cala bote da qıryawotho Suryoye du Turo d’İzlo u dayroyo di dayro d’Mor Yahkub Sefer Aho Bilecen msıkwo bu thomo di mcadronutho du tukoso marhıbono.

Bıthır mu msoko du dayroyo a şutose du camaydan, wu camaydan mahwewolın hfuxyo. Calu hboso dsımwo Dayroyo Aho 14 bu yarho d’Konun u Haroyo trewo hiro, b’şart dobe kull naqla imda lu qaraqol. Bu şıkılano i dacwayde mdawamla huwe hiro. Li dacwa rbicoyto du dayroyo Aho dsimo athmıl bu bethdino d’Mırde mıtşawtafle u sniğrayde.

Bi dacwathe dlo hiw aftho dhodarla gelyunore, hiw fusqono di dacwa hreto du dayroyo Aho gıdhuyo bu yarho d’Nison dıbqamuthayna. U bethdino d’Mırde ktolıb d’Dayroyo Aho dmitahwele msombrişo awkith jaza cal dıkmıthım dkıtyo hadomo d’tukoso marhıbono. U thomano kothe cal ha ma gerilla di HPG dmırle u Dayroyo dhulelın muklo ba 2018.

Dayroyo Aho bi ifade dhule mırwole; Bi şato da 2018, 2 farsufe athın li dayro. Tlıbbe muklo meni u onoste hulilın. Inaqlayo’ste lo mankarli u medano. Tlıbli mi jandarma dmazidi i mşaynutho leşan naqla hreto dlowe cayni şwolo, elo lo sımwo mede. Ono man dothe lu tarcaydi gıdbenole muklo. Lfuth i falsafe di tawdithaydi klozım dsamno u medano. Cal dkıtnoste dayroyo laybi dımdagalno. Ono u medano ksamnole lo leşan dımcadarno tukoso, i haymonuthaydi ktulbo u medano meni. Lfuth i falsafe di haymonuthaydi laybi dmaşkeno cal noşoste.

Bi dacwa tlithoyto msanatwo cal 2 sohude uha menayye mırle dlokodıc Dayroyo Aho, belhude şamıc ma hawronayde dhulelın muklo. U sohudo hrenoste mırle dtlıblın muklo mene, wu dayroyo belhude hulelın muklo u lo dacwo manne.