U Papa kobıc maxlıs i tawditho mşihoyto bu Madenho Mescoyo

U waziro di baroyutho du Vatikan u rişhsayo Paul Gallagher makadle, du Papa du Vatikan Mor Fransis Qadmoyo, kobıc dmaxlıs i tawditho Mşihoyto bu Madınho Mescoyo.

U rişhsayo Britanoyo mırle; U haşo wa çurhe dıkcayşi a Mşihoye du Iraq, d’Lebnon u d’Suriya, kımşakli qetro rabo lu dactith di Mşihoyutho bu Madınho Mescoyo wu hano şwolo jıddi du geopolitikyo.

U rişhsayo Britanoyo Paul Gallagher dkıtyo bebzabno u waziro di baroyutho du Vatikan, sımle mamlo li dafo Qatholiqoyto d’Crux cali socurutho dsımle i qadişutho du Papa Mor Fransis Qadmoyo lu Cıraq u m’akadle, du Papa kobıc dmaxlıs i tawditho Mşihoyto bu Madınho Mescoyo.

Bu mamlayde u rişhsayo mırle; U xyoro du admo, uhaşo wa çurhe dıkcayşi a Mşihoye du Iraq, d’Lebnon u d’Suriya, kımşakli qetro rabo lu dactith di Mşihoyutho bu Madınho Mescoyo wu hano şwolo jıddi du geopolitik’yo, cal da Mşihoye mu yawmo dyawme bu qlimano’wın u kull naqlaste hawilın dawro beyn da came hrene dkıtwın bu haylo quwytır menaye.

Paul Gallegher mırle; Calathe u snodo di ithutho di Mşihoyutho bu Madınho Mescoyo, sbutho dkobıc Papa dkole aclayayo walaw ğalabe casqoyo. Kımnasena dgurşina u kenşo Emwothoyo u dmawdıcinale i mşalutho dkıtle, dfolıh leşan dmıxlıq şartat towe leşan a Mşihoye dqudri dhozın ruhaye mşayne bnişo dfayşi ba dukothathe. İ celtho rişoyto di socurutho du Papa lu Iraqste hathewa.

U waziro di baroyutho du Vatikan mırle; U veyoco da waridaydan bu Madınho Mescoyo, gıdtore tathir ğalabe rabo u jıddi u law kıfoyış ithutho Mşihoyto bu qlimo wu gıdfoyış kull mede xıd şıkıl d’bethcatiqotho. Kito qento du Madınho Mescoyo dhowe xıdu garbyo d’Afriqya i ithutho Mşihoyto bi qıtcathe, ucdo belhude falqo du makthabzabno’yo. Bu Iraq kıtwo hol milyon u falge d’Mşihoye elo adyawma 250 alfone a Mşihoye mahzamlın ma qrobe umu cnufyo dsim aclaye.