U parlamento d’Urifi b’sagiyutho da qole, maqbele i rmoyto dıkkırho b’qaşyutho a’hçome dıkmisomi cala qalilwotho tawdithoye b’Suriya

STRASBOURG, Fransa — U parlamento d’Urifi m’ayadle ruşmoyith i rmoyto dıkkırho b’qaşyutho a’hçome dıkmisomi cala qalilwotho tawdithoye ucala dukotho di cabade b’Suriya. Bu quwolo dsim athmıl, mbayn da 720 qoyume 625 m’ayadlın u mırlın E li rmoytathe.  

Lfuth i rmoyto dmaqbılo, a’qoyume Urifoye mahwelın ilothnihutho rabtho dkıtlın mqabıl di şalqa du cnufyo da madhahbe dqaşyo ğalabe b’gawıd d’Suriya, dilonoyith u hçomo marıhbono dsim 22 bu yarho d’Hzirın dşaficina cali cito d’Elyas Hayo bi erişkoyto d’Suriya bı Darımsuq, udıdbih ebe 25 sohde u zıd m’60 hrene mçarhi. 

İ rmoyto Urifoyto grışla u zuhoro calu grub marıhbono hatho dıkqore ruhe “Saraya Ansar Alsunna” dmıdle calruhe i mşalutho du hçomo cali cito, u mawdacla ste du medano şuşoto du qentoyo, uklozım dmınfıq mqabıl dide. 

Bebzabno, u parlamento d’Urifi tlıble mi şultonutho d’Suriya dmaydo tedbire msarhıbe laşan dmişawşıto i aykanoyutho di mşaynutho, udmisım u sutoro da dukotho di cabade. U parlamento tlıble ste m’Darımsuq dmihathıtho i cito d’Mor Alyas dımfarqıco, udmi’amın snodo kamilo la debhe du hçomo ula yaqrothaththe. 

Camgabıdathe, a’qoyume Urifoye makadlın dıklozım dmisım buqore msarhıbe u şafye cala hçome haroye dhawın bhaq da qalilwotho tawdithoye d’Suriya, udmisım u garanti dmimıd hşowo ma hayobe, u makadlın ste i ulsoyutho dmitahwe iqoro li hirutho di tawditho ulu sutoro da came mşahılfe du kenşo d’Suriya.