01/02/2025

U polis marfele a 5 thimoye bu qatlo du hfito Suryoyo Selwan Momika

Ba tebe haroye dfrisi cali sbutho du qatlo du hfito Salwan Momika b’Södertelje du Swed mawdıc, da hamşo farsufe dımsikiwo ma thome di asirutho dcamu qatlano d’Momika, marfın. İ daira du mqımdino du Swed mırla; A thome du hawbo dsımlın a hamşo farsufani madhcaflın, u lıkhozina dkito ucdo heş sniqutho dfayşi msike.

DERTÄLJE, Swed – İ sbutho du qatlo d’Salwan Momika dkıtwe man abne du camaydan du Cıraq u idico bu Swed bu tewqido du qurcan, kımdawmo dmaydo duktho bu tbocofroso Emwothoyo. Cala şuşote haroye dcalu qatlano d’Momika, huwle u mqımdino Rasmus Öman mawdconutho lu froshezwo du Swed.

U mqımdino m’akadle, dmarfın a 5 farsufe dıkmıthomi bi sawco dhawilın bu qatlo d’Momika, cal da ithbate latne makfıyone. Elo camgabe dmarfın a farsufani, a thome kamiloyith lo maqimi maclaye wa buhone kımdawmi cali asiruthathe bu qatlo d’Momika yawme d’Arbco casriye bu balkong du baytayde.

Mawdıc d’4 ma farsufani latne mqayde dsımlın meqım hawbe bu Swed wa 5 thimoyani beyn 20-60 eşne’ne, kulle me Södertelje’ne u beynothaye kito’ste ahıl du qtiloyo. Bu frosqolo du Swed’ste mawdıc, d’Momika latwole noşo dsoyım u sutorayde bu zabno dqtılwo.

Calu qatlano d’Momika, u polis mnıcle ucdo u Danmarkoyo-Swedoyo Rasmus Paludan dsoyım ucdo taklitho bi arişkoyto d’Danmark-Köpenhamn. Paludan dkıtyo folitiqoro tuhmonoyo, idico’yo huwe’ste bu tewqido du kthowo da Maşılmone. Paludan’ste xıd Momika, ğalabe naqlat mhadıd bu qatlo cal dıkmawqıd u qurcan b’dukotho ruşmoye.