U Qaymaqam d’Bağdede mıstaqbele umşawrono du rişwazire du Iraq

U qaymaqam di qastra Suryoyto d’Bağdede di daşto d’Ninwe ardixlo Cisam Bıhnam Hındi, mıstaqbele u mşawrono du rişwazire du Iraq dcala sebwotho da qalilwotho umthoye u tawdithoye Safaa Hındi.

 Bi ytawtathe drişo i aykanoyutho di mşablonutho kenşoyto wa tarmiyotho du bnoyo u hethotho dkamili bi qastra d’Bağdede.

 U mşawrono du rişwazire du Iraq dcala sebwotho da qalilwotho umthoye u tawdithoye Safaa Hındi, athmıl sımle socurutho lu qentrun di qastra Suryoyto d’Bağdede di daşto d’Ninwe, u laqi u qaymaqam ardixlo Cisam Bahnam Matti.

Bi ytawtathe, u mşawrono du rişwazire dkıtyo bebzabno u rişono di osarto Kaldoyto mıdle mawdconutho cali aykanoyutho d’Bağdede u cali kmoyutho da tahrazyotho du bnoyo u hethotho dsim hul ucdo bi mditho. Ubebzabno griş u zuhoro calu menyono da yaqrotho galwoye dıdaciri l’Bağdede u cali aykanoyutho di mşablonutho kenşoyto.

Camgabıdathe, u mşawrono du rişwazire wu qaymaqam mawdaclın dıklozım dhowe methcadronutho u awyutho bayn da came mşahılfe d’Bağdede, u makadlınste dıklozım dmiyaqri a zedqe di barmothoyutho u di ciyeşe mşawtafto, u dımdawım u diyalog bnişo dmımte lışroye dıksaymi u garanti da zedqe da came kulle, lfuth aqonune du nomuso esonoyo du Iraq u b’şart dmınfıq moro la diloyotho dkıtle kul camo ma came du athro.

Li ytawtathe, mıştawtafle u mdabrono da pwelıs di qastra d’Bağdede, u mşalo da grube du sutoro di daşto d’Ninwe, u mdabrono di karxutho d’Bağdede, u mdabrono du qentrun di mşaynutho umthoyto di qastra wu mşalo du sutoro da citotho di hiğmonutho d’Ninwe rabhaylawotho Fares Cabdılahad Zaki.