U Qlimo d’Kurdistan mahwele hfuxyo lu fusqono dmıdle Boğdod, dmaklele u tehwiyo du ağro da fqide du qlimo

 ARBCA-ILO (ARBIL) – İ wazirutho du mumuno du qlimo d’Kurdistan bu garbyo du Cıraq frısla athmıl maqırhonutho xıd funoyo lu fusqono dmıdla i wazirutho du momuno du Cıraq bi sbutho du sahmo dkıtle u qlimo bi butçe gawonoyto du athro di şato da 2025. Lfuth i maqırhonuthathe du qlimo, kıtte 9.1 trillyone dinare bu butçe di şatathe-bıthır mıd u bank qentrunoyo du Cıraq grışwole 4.2 trillyone dinare.

Calathe Arbil sımla sturyo u metodano di şultonutho d’Boğdod dlatyo bu taro du nomuso du athro udi mşalutho di şultonutho qentrunoyto’yo dobo u mcaş da fqide, da mşawtıbe, da yaqrotho da Sohde uda dıbhe du qtolcamo d’Anfal. İ sbuthathe’ste grışle folitiqoro Mşihoyo u zuhoro acla u sımle Boğdod sturyo cal dmaklela dobo u mcaş da falohe ruşmoye du qlimo holi harayto di şatathe.

U folitiqoro Mşihoyo-Diya Boutrus Sliwa dkıtwe meqım u mşalo du Komisyon şaryo da zedqe noşoye bu qlimo, mawdacle u ğamo dıktocın calu tathir dgıtore u fusqonano cali mşaynutho du qlimo u gawonoyith du Cıraq. Me gabo hreno calu şwolano dnafıq beyn da 2 şultonwotho, Amerika’ste mawdacla u renyayda.

İ wazirutho di baroyutho d’Amerika mırla; Kısaymina qroyto hem l’Boğdod u l’hemste Arbil, dhayri cala nomuse dkıtte u dımsafın a qetrathe b’dialoge dkıtne mawthrone, u camathe’ste, dmabdın u maşıqlo du futoho di borriye du ğaz dıkfayto beyn du Cıraq u Turkiya. U tehwiyo du mcaş da fqide, kobo egartho d’Boğdod kubco i towyutho du camayda kule u kıxulqo muzoğo msimono bu athro.