U rişhsayo d’Viyana kardinal Kristof Şonborn mtayable qerowo alohoyo calu madıbho da sohde du Sayfo

U rişhsayo d’Viyana kardinal Kristof Şonborn dıksoyım ucdo socurutho lu athro d’Suriya, mtayable qerowo alohoyo calu madıbho da sohde du Sayfo bi Mcartho d’Saydnaya.

Meqım mathe ste, kardinal Şonborn mıştawtafle li slutho dımtaybo bu qentrun fatıryarxoye di cito Suryoyto b’Darımsuq, bnişo dmitarku u şlomo b’Suriya.

U rişhsayo d’Viyana kardinal Kristof Şonborn, athmıl bıthır m’falgıdyawmo mrayşanle u qurobo alohoyo calu madhıbho da sohde du Sayfo bi dayro d’Mor Afrem Suryoyo bi Mcartho d’Saydnaya bı Darımsuq.

Bu mamlo dsımle kardinal Şonborn, grışle u zuhoro cali sniqutho dkıtle u barnoşo li iqartho, laşan d’roğış bı mşaynutho kamılto, ubebzabno mahwele i fsihuthayde cal socurutho dıksoyım l’Suriya, u msalele ste laşan dmitarku u şlomo bu athrano ubıbritho.

Lu qerowano mıştawtafle i qadişutho du fatıryarxo di cito Suryoyto Ortodoksoyto Mor İğnatiyos Afrem Trayono, i qadişutho du fatıryarxo da Suryoye Malkoye Qatholiqoye Mor Josef Cabsi, u rişızgado du papa b’Darımsuq kardinal Mario Zinari u menyono celoyo ma hsayo di cito Suryoyto.

Hathe inaqla qamaytoyo dkımsale rişono b’darğo celoyo di cito Qatholiqoyto, slutho du qerowo alohoyo calu madhıbho da sohde du Sayfo da na’1915.

Meqım mathe ste tre bu yarhano, kardinal Şonborn mıştawtafle li slutho du şlomo dımrayşınole Mor Afrem Trayono bi cito d’Mor Jırjıs bu qentrun fatıryarxoyo dı Darımsuq.

Camgabıdathe, kardinal Şonborn sımle socurwotho li cito Suryoyto d’Im Alzınnar b’Hımıs, li cito d’Mort Taqla d’Maclula, ulhın şutose di mcadronutho dımşatsila i fatıryarxutho Suryoyto bı Darımsuq.