Mşare bu hethotho dı tloth citotho du camaydan bu daşto d’Ninwe

Mşare ucdo ba fulhone du bnoyo u hethotho dı tloth citotho du camaydan bi daşto d’Ninwe bu garbiyo du Iraq.

Atloth citothani dkıtne ba mdinotho d’Barıtle ud’Bağdede, kmisım u hethothaththe mi sictho dımbayno laşan u bnoyo d’Mawsal.

İ sictho dımbayno lu bnoyo d’Mawsal, mawdacla lumıhreno dımşarelın a’fulhone du bnoyo u hethotho dhın ma citotho mşamhe dıshifi bi daşto d’Ninwe, bnişo dmitafiti lu grub da citotho dıdıqwo u noquşaththe ba yawme haroyani, ud’sımwo u futohaththe bı Mawsal ubi daşto d’Ninwe.

U mşalo di sictho du bnoyo d’Mawsal ardixlo Cabdılqader Daxil, bi maqırhonutho dhule li dafo d’Bas News, mawdacle di sictho mşarela bu taro di kampanyayda i trayonitho, bu bnoyo d’tloth citotho shife da Suryoye Ortodoksoye u Qatholiqoye ba mdinotho d’Bağdede u Barıtle, bnişo dmidıq u noquşaththe m’hatho bıthır mıddacır falqo rabo mu camaydan la botayde bi daşto d’Ninwe.

Daxil mawdacle ste da grube di ardixlutho gdımşarın bu maşıqlo du bnoyo da tloth citotho, bıthır mdımkamli u teqimo du zawlo uda shifotho dkito b’gawıd da citothani u hedoraye.

Bi şabtho dşaficina, i mdabronutho gawoyto d’Ninwe sımwola u futoho di hasyutho d’Mor Bulıs di cito Kaldoyto dkıtyo bi fnitho d’Almuhandisin bı Mawsal. Ubebzabno zıd m’70 yaqrotho mu camaydan dkıtwın galwoye bu qlimo d’Kurdistan du Iraq, dacriwo bi şabtho dşaficina la fenyothaththe bı Mawsal.