U Rişızgado Amerikoyo mawdacle u qrobo beyn d’İsroel u da Carab gıdtoyım

U rişızgado d’Amerika b’İsroyel Deved Fridman, mawdacle du qrobo Caraboyo İsarloyo gıdtoyım b’zabno dıkmo yarhe yaste b’zabno d’şato bu zyudo dkulle.

 Mxasra hreto u rişızgado Amerikoyo bu Iraq Mathyo Toler, mawdacle da hjome dıkmisomi cali fnitho Yarıqto d’Boğdod kıtlın u nişo dmaciqi i şultonutho d’Mustafa Alkazimi.

 U rişızgado d’Amerika b’İsroyel Deved Fridman bi maqırhonutho dhule li sferyawmo d’Yisrayil Hyum, mawdacle du qrobo Caraboyo İsarloyo gıdtoyım cal qariwo awkith b’zabno dıkmo yarhe yaste b’gawıd şato bu zyudo dkulle.

Fridman mırle “latna rahuqe mu tyomo du qrobano, cal dkito ğalabe athrawotho Caraboye gıdmıştawtıfi calqariwo la qyome du şlomo dımdın cam İsroyel b’Waşington.

Fridman dmawdacle di şultonutho d’Fleşt bu maşıqlano ducdo kıkılyo bu gabo fawdo du makthabzabno, ba melani mdawamle “u şlomo gado yo dbalhude naqla hdo kul generasyon kmikarır. Bıthır mıdtıfkina u maşıqlo du şlomo laf qıddam, kiban dıdcrina li sbutho di morutho İsarloyto b’şıkıl dlıkxolıq ğalabe zmomo. Klozım dkul noşo dodıc d’ahna i mdabronutho qamaytona dmawdacla du terkiwo da İsarloye b’fenyotho hathe da Fleştoye latyo mqabıl du qonuno emwothoyo, ube bzabno ahna i mdabronutho ihidoytona dımbayanla tahrazto du şlomo dıkrıfdo dmitawfıqi a’Yudoye ma botaththe dkıtne bi fnitho di Diffa Macırboyto”.

Mxasra hreto, u froshezwo d’Alcarabiya sımle maqıblonutho camu rişızgado d’Amerika bu Ciraq Mathyo Toler dmahwela eba i hzayto dkıtle cala hçome dıkmisomi b’soruhe d’Katyuşşa cali fnitho Yarıqto bı Boğdod wa hçome dıkmisomi cal nuqazyotho folhoye dkibın haylawotho Amerikoye. Cali sbuthathe, Toler mawdacle da hçome dıkmisomi cali rişızgadutho Amerikoyto ucalu koalisyon emwothoyo kıtlın u nişo dmaciqi i morutho di şultonutho Iraqoyto dkımrayşanla Mustafa Alkazimi.

Athmıl bu zabno dhawi furqoco bi fnitho d’Alşacıb bu garbiyo d’Boğdod, mfarqıcste hdo foquctho dmahto dmahto b’gawıd du inistitut Amerikoyo du leşono englişoyo bi hiğmonutho d’Alnajaf. Lfuth a’puwelıs Iraqoye, u husrono dhawi bi netiçe du furqocano balhude momunoyo yo.