u rişono du gabo di PKK Cabdalla Öçalan sımle qroyto la came dı Turkiya dmaydi li ido u maşıqlo du şlomo

TURKIYA — Bu kunoşo camonoyo dımtayıb athmıl bi mditho d’Stambul bi cohnutho du yawmo tibeloyo du şlomo dıknofıl kul şato ha bu yarho d’İlıl, i tahlufto du gabo dı Dem parti mi dayira d’Wan Gulçan Kaçmaz qrela i egartho du rişono du gabo di PKK Cabdalla Öçalan dımqalasle eba i qroyto dsımwole 27 bu yarho d’Şbot dşaficina dımhalıq u gabayde u zayno, u mırle “i qroytathe dawse stratijikoytoyo u nuqazto d’şuhlofo makthabzabnoytoyo”. 

Öçalan bi egarthayde, mawdacle bu darbo di qroyto dsımle mşarele maşıqlo hatho b’Turkiya ubu qlimo du madınho mescoyo, maşıqlo dıkmitarku ebe haye demoqratoye dkıtne banye calu şlomo b’dukthıd du qrobo udu shofo. 

Lfuth Öçalan, u şlomo şariro latyo balhude i şatiqutho du zayno aw u tyomo du qrobo, elo u şlomo şariro i mıcnayde dmişarrıro i hirutho wi demoqratoyutho wi kinutho kenşoyto ba haqle mşahılfe da haye. 

Bi egarthayde, Öçalan sımle ste qroyto la came dı Turkiya dmaydi li ido u maşıqlo du şlomo, u mırle “u athrano mucdo w’azolo gıdhowe athro lani dıkmıtyaqni du şlomo uda haye demoqratoye zedqo u wolithoyo elaye”. 

U gabo di şawyutho udi demoqratoyutho da came dı Dem parti, yawme d’Cruto dşaficina mawdacwole i tahrazto da hfitwothayde laşan du yawmo tibeloyo du şlomo. Bu tarano, Dem parti mtayable adyawma kunoşe u halxe u knuşye lu tboco froso.