Ahmed Aljabra
20/04/2022

U rişono du Gbino du Şlomo udi Hirutho d’Suriya Ahmad Aljarba, mhanele GHS, ADO wu GABBA, calu qyomo du fhomo dımde baynothaye

U gbino du şlomo udi hirutho dkıtyo saqıbloyo du rejim d’Suriya, mahnele u qyomo di fhomo udi awyutho dımde bayn da hayle folitiqoye dkımmathli u camo Suryoyo Othuroyo d’Suriya. U rişono du gbino Ahmad Aljarba bi maqırhonutho dhule lu tboco froso, mawdacle du qyomano dawse lafu darbo trisoyo.

20/04/2022

U rişono du gbino du şlomo udi hirutho d’Suriya Ahmad Aljarba, mhanele u gabo du Huyodo Suryoyo d’GHS, i Mtakasto Othuroyto Demoqratoyto d’ADO wu gabo Othuroyo Demoqratoyo d’GABBA, calu qyomo du fhomo dımde baynothaye udmawdacwo bi hfitutho mşawtafto di rişıdşato umthoyto d’Ha Nison d’Akitu.

Aljarba dkıtwe meqım u rişono du Mawtbo Athronoyo saqıbloyo d’Suriya, bi maqırhonutho da tahanyotho dhule, mawdacle du qyomano dawse lafu darbo trisoyo, dawse dkiba dmazido i mlahmonutho, dmaqwiyo u tuxlono udnıfqo moro li mşaynutho gawoyto lawğıl du camo Suryoyo Othuroyo.

Aljarba makadle ste du fhomo folitiqoyo dkowe b’gawıd d’ha camo, kfotıh u darbo laf fhome bayn da came hrene d’Suriya, ukımtayıb ste i arcutho du diyalog dkıtyo u tarco du mantıq, du hawno, du renyo udu renyo du mqabıl.

Ba tahanyotho dıfrısle Aljarba mırle ste “bıthır ma dbohnafşe dımqadmi ma n’abne du camaydan d’Suriya ba gawne u hiyoywotho mşahılfe dkıtle, haw fayış kmitaqbıl dımdawım u mafhum d’ha gabo, ya d’ha rişono u yaste d’ha camo”.

Bebzabno, Aljarba makadle da bnaymothoye d’Suriya kulle b’ha nişone dmişatıs elaye athro d’şutose, athro dıkforış bayn da tloth şultınwotho du bethdino, du nomuso udi mşablonutho dıkmidabri lfuth u mantıq di sagiyutho folitiqoyto dıkhıkmo wi qalilutho folitiqoyto dkuyo saqıbloyto. Wu medano kule klozm dhowe bu telolo du qonuno udu nomuso esonoyo du athro dkımyaqır a’gawne mşahılfe da n’abnayde.

Bu huthomo di maqırhonuthayde, Aljarba mırle “mın şafiroyo dhozina u Caraboyo kmoyıd lidothe i sbutho da Kurdoye wu Kurdoyo kımdafıc a’zedqe da Suryoye Othuroye, wa Suryoye Othuroye kobın ağuno laşan a’Caraboye. Kıtlan sabro du qyomo dhawi bayn da gabe du camo Suryoyo Othuroyo dmamte a’firayde bu dactid karyo dıbqamuthayna bi fnitho di Gozarto d’Suriya”.