U rişqutno d’Ukraina Volodimer Zelenski mqalasle u fusqono dmıdla Amerika dmitahwe garanti di mşaynutho l’Kiyev

KIYEV — U rişqutno d’Ukraina Volodimer Zelenski mqalasle athmıl u fusqono dmıdla Amerika dmitahwe garanti di mşaynutho l’Kiyev, bu taro dkul şıkıl d’qyomo du şlomo dıkmıntır dhowe cam Rusya. 

İ maqırhonuthathe d’Zelenski athyo luhwoyo meqım mi lqoyto dhawile adyawma camu rişono d’Amerika Donald Trump bu Qusro Heworo ubi mıştawtfonutho d’rişone Urifoye. 

Bıthır mu knuşyo dsim bu darbo du vidio la rişone du koalisyon dıkhobış b’gawe athrawotho noqufe l’Kiyev, Zelenski bi maqırhonutho dıfrısle ba dafe kenşoye du nawlo mırle “u garanti di mşaynutho i netiçe du fulhonaydan u mşawtfo yo. U garanti di mşaynutho klozım dım’amın sutoro di naşfe, di hawa udu yamo, uklozımste dmitayıb bi mıştawtfonutho d’Urifi”. 

Camgabıdathe, u rişqutno dı Fransa Emanuwel Macron bu knuşyo dsim athmıl bu darbo du vidio, mawdacle du baramnayde d’Rusya Valdimer Putin lıkobıc dhowe şlomo cam Ukraina, elo kobıc d’Ukraina dmasılmo ruha yo. 

Macron bu mamlo dsımle mırle ste “hal kmıtyaqanno du rişqutno Putin kobıc u şlomo? İda dkıbcitu i qanacaydi i qwitho u funoyo lo yo. Kobıc d’Ukraina dmasılmo ruha. Ahna kıbcina şlomo qawyo u aminoyo, şlomo dkımyaqır u qonuno emwothoyo, udkımyaqır i morutho da n’athrawotho kulle wi mşaynutho da n’arcothaththe”.