U rişwazire d’Armenia mzaharle dkito qento dmisım inqilab folhoyo

U rişwazire d’Armenia Nikol Paşinyan grışle u zuhoro, dkito qento rabo dmisım inqilab folhoyo cali şultonutho d’Yerevan.

 Bi maqırhonutho dhuwle Paşinyan mırle; Bıthır mıd u gayso tlıble meni umi şultonuthaydi dmıstacfena, kımahwe dkito qento dmisım inqilab folhoyo aclayna.

U rişwazire d’Armenia Nikol Paşinyan huwle adyawma maqırhonutho lu tbocofroso cali aykanoyutho harayto du athro u grışle u zuhoro calu qento dkito, du gayso Armınoyo dsoyım inqilab folhoyo acle ucali şultonuthayde. U mamlano d’Paşinyan sim, bıthır mıd u gayso tlıble mene dmıstacfe mi wolithayde.

Paşinyan, hani zabno kmisım protesto ba tagliyotho dsimi ma saqıbloye du athro u tlib mene dmıstacfe, calu şıkıl dımsafele u kriz d’Qarabax cam Azerbaijan bi mescoyutho d’Rusya dımdawamwole 6 şabe beyn Armenia u Azerbaijan uda muttafikayda-a Turkoye.

Bu qyomo di şalyuthzayno dımdewo beynothaye, Azerbaijan mıdwola u duyoqo d’dukotho frişe dkıtwın meqım d’Armenia wu camo mahwewole hfuxyo cal dmidiwo a dukothani menaye. U rişwazire Paşinyan mawdacle’ste adyawma, dmıdle ha ma rabahaylawotho rişoye du gasyo mi wolithayde cal dtlıble mene dtore mi wolithayde.

Elo Paşinyan kull naqla rfıdle u talabano di isticfayde wu adyawma tlıble ma sanodayde, dsaymi protesto b’Yerevan, leşan dmahwın u snodathe ele u dmıstacmıli a mkone kulle du nawlo. Bu yarho d’Konun u qamoyo, maczamwole Paşinyan a gabe folitiqoye l’droşo, bi sbutho du tuyobo da guboye gawonoye dıkmıntır dmisomi adşato, ela a saqıbloye kubci dmıstacfe meqım ma guboyani.