U Rişwazire zabnoyo d’Lebnon mawdacle gmıstacfe mi wolithayde

U rişwazire zabnoyo d’Lebnon Mustafa Adib, adyawma mawdacle dgımıstacfe mi wolithayde mcal fothe du qetro du şekolo di şultonutho hathto du athro.

 İ mawdconuthathe d’Adib hiw, bıthır mi ytawto dhawile athmıl camu rişqutno Michel Aoun, u dmawdacwole u renyayde calu floğo da wazirwotho hathe di şultonutho.

 U rişwazire zabnoyo d’Lebnon Mustafa Adib, mqadamle adyawma i isticfayde, qariwo lı yarho bıthır mıd mnaqewo rişwazire du athro. İ isticfathe d’Adib, gıdobo husrono lu tacbo dkobo Fransa, leşan dmaqimo u kriz d’Lebnon dilonoyith u kriz momunoyo du athro mathır mu furqoco dhawiwo bu lımino di arişkoyto bu yarho dı şafıcina.

U rişqutno Franşoyo hani zabno ksoyım hboso cal Beyrut, leşan dmişakıl şultonutho hathto dı qudro dsaymo reforme hathe bu athro. U rişwazire Adib dıkmısnadwo me Fransa, laqi qetre rabe bu zabno da gabe d’Hizballah u Amal mdacelın ba wazirwotho ulsoye du athro xıd mathlo i wazirutho du momuno.

U qedomano da Şica maqşewo, bıthır mıd Amerika mahıtwola tedbire cal 2 mşale d’Hizballah. Bi netije a gabe Şica, rfıdlın a renye dathın kulle leşan dmifarqi a wazirwotho di şultonutho hathto. A Şica mawdaclın, dhınne gdımbayni u farsufo dkubci li wolithathe.

Mabuco folitiqoyo mırle; Bu zabno di ytawto dhawiwole Adib cama mathlone d’Hizballah u Amal yawme d’Hamşo dı şafıcina, a Şica rfıdwolın dmaqbıli ayya renyo d’folitiqoro li wazirutho du monuno. Cali aykanoyuthatheste, Mustafa Adib bıthır mi ytawto dhawile calu rişqutno Michel Aoun, mawdacle u fusqonayde di isticfa.