U Tukoso Emwothoyo du Ğamo dcala Mşihoye grışle u zuhoro calu hçomo dsim cali cito d’mort Şmuni b’Şırnaq

U Tukoso Emwothoyo du Ğamo dcala Mşihoye, grışle u zuhoro du tbocofroso Emwothoyo, calu hçomo dsim cali cito du camaydan d’Mort Şmuni bi qritho d’Mıhre dkıtyo b’Şırnaq d’Turkiya.

Bu tebano dfrısle u tukoso d’İCC mırle; U hçomano sim cali cito, dcayni qritho d’htıfwo mena Hurmus u Şmuni Diril-dkıtne i emo u babo du kohno Kaldoyo Ramzi Diril.

Bu tebano dfrısle adyawma International Christian Concern (ICC) awkith u Tukoso Emwothoyo du Ğamo dcala Mşihoye mawdacle, d’11 bu yarhano matile xabro, dsim hçomo u dhiw husrono li cito d’Mort Şmuni di qritho d’Mıhre dıknuflo bu tayman madınho d’Turkiya, me farsue dheş latyo i hiyoyuthathe idıcto. Mıhre, i qritho dhtıfwo mena u zawgo-Hurmus u Şmuni Diril’yo.

Bıgawe di cito mahrıwi a surotho, a slibe wa remze tawdithoye di cito. Bu tebano İCC mahkele bşıkıl rwiho cali emo u babo du kohno Ramzi Diril u ema daciri li qritho bıthır ışne bi golutho, aydarbo htifi mi qrithathe-dkıtwa meqım du camaydan u dımqafyo i şlado d’Şmuni Diril 20 bu yarho d’Odor da 2020, elo dheş u barzawgayda mvayco’yo u d’noşo lıkodıc i ctiduthayde mın’yo.

U tukoso grışle’ste u zuhoro cala fulhone dmaşele u sniğro di iqartho Kemal Cengis bi sbuthathe du htofo wu heş holucdo madcır funoyo qriho aw msimono acle ma mşale Turkoye leşan dmitabde buhone. İCC mawdacle’ste di sbuthathe d’Diril, mbahaswo acla bu taroro şatonoyo du Komisyon Amerikoyo di Hirutho Emwothoyo da Tawdithoyo udu taşroro di wazirutho di baroyutho d’Amerika.

Ba taşrorano frışwo’ste duktho lu qedomo di şultonutho d’Turkiya la Mşihoye ula qalilotho du athro wu gzomo dheş kito cala haye da Mşihoye uda dukothathe a tawdithoye u marduthoye. Mawdıc’ste; En dlo mihaşwi a hayobe, aydarbo gıdhowelın a Mşihoye tuxlono dqudri ducri la dukothathe a makthabzabnoye?.