U waziro du finans d’Australia mdele u snodo di mawdyonutho du Sayfo

U waziro du finans d’Australia mdele i maqırhonutho du snodo di mawdyonutho bu qtolğenso dsim calu camaydan, calan Armınoye u cala Yawnoye mi mamlaxtho da Cuthmanoye ban 1915.

 U waziro di şultonutho federaloyto d’Australia Michael Sukkar dkıtyo bu şerşo Lebnonoyo, snıdle i maqırhonutho dcali mawdyonutho bu Sayfo dsımla i mamlaxtho da Cuthmanoye ban 1915.

Li lohitho di mawdyonutho bu Sayfo dsim ban 1915 cala Mşihoye dıkhoyanwo bi mamlaxtho da Cuthmanoye, mıştawtafle ucdo u waziro du finans bi şultonutho federaloyto d’Australia Michael Sukkar. An ışmone di lohithathe da qoyume u senatore d’Australiaste, kul dkothe kyurxo.

U waziro Sukkar dkıtyo mu şerşo Lebnonoyo u mi marcitho d’Melbourne, heş ma 2018 kısonıd i mawdoyunutho bu qtolğenso dan 1915 u bu mamlayde mırle; En hın şultonwotho u athrawotho xıd Turkiya u Azerbaijan dmahrıwi a esorathe a momunoye cam athro dıkmawde bu qtolğensano-inaqla’yo tro qutci a esorathe. Elo ono kodacno, du camo d’Australia gıdsonıd i mawdyonuthathe du qtolğenso dsim cala Mşihoye mi mamlaxtho da Cuthmanoye ban 1915. Calathe kısamno qroyto la wazire di şultonutho kulle, dmıctarfi bu qtolğenso dsim calan Armınoye, Othuroye u Yawnoye u dmaqwın a ithbate dkito mqabıl du tenkirano d’Turkiya li siyasaydan di baroyutho.

Bu yarho d’Şbot dı şafıcina, mşakalwo İnisyatif mşawtıfo di Kinutho bu parlamento d’Australia leşan u mdoyo d’maqırhonutho dımtaybo’wa mu Komisyon Athronoyo dan Armınoye b’Australia, mu Huyodo Tibeloyo Othuroyo u fırco d’Australia wu Mawtbo da Yawnoye b’Australia, leşan u athro dmawde ba qtolğense da 3 camani. Bu şıkılano holucdo, mawdelın 21 senatore, qoyume u wazire bu Sayfo dan 1915.

25 bu yarho d’Şbot, a tukose da 3 camani mtayabwolın hfitutho marduthoyto l’100 hadome du parlamento, mşale di wazirutho di baroyutho, falohe da makthbe folitiqoye, akademikoye, u falohe du tbocofroso uğer, leşan dmitalım imdat di mawdyonutho bu qtolğenso dsımwola i mamlaxtho da Cuthmanoye calu camaydan, calan Armınoye u Yawnoye bu zabno du qrobo qamoyo dbritho.