U Yuqdono dhawi mahrawle i maşritho da galwoye d’Lesbos

U yuqdono d’nafıq bi gzırto d’Lesbos, mahrawle i maşritho rabtho da galwoye dkıtyo bu Yawnan.

 Yawme d’Arbco b’lalyo, nafıq u yuqdonano bi maşritho d’Moria u heş adyawma, qadiri dmatfın i nurathe, dhawyo celtho da galwoye dfayşi dılo bote. Bi maşrithathe kito hol 12 alfo galwoye dımrajaclın galwoyutho lan athrawotho d’Urifi.

 A yuqdone hawın bıgawe u hedor di maşrithathe d’Moria dkıtyo i maşritho rabtho da galwoye bu athro du Yawnan. İ maşrithathe dkıtyo bı gzırto d’Lesbos, kiba hol 12 alfo galwoye me athrawotho frişe dı britho u dkıbci dcubri l’Urifi. İ mdabronutho di gzırtoste, sımla iclan aykanoyutho şnızto l’zabno d’4 yarhe.

Mawdıc da yuqdonani matfın ucdo u noşo lo mjarıh ğalabe yaquro, elo ban alfayo d’galwoye dfayışi dlo bote hın menaye saliqi lu turo, ğer azzın la qıryawotho u hınste kdumxi ba darbone. A galwoyani kızayci ma comure di duktho, mu polis u ma galwoye hrene dkıtte u virus d’Corona.

Cali sbuthatheste u rişwazire du Yawnan Kyriakos Mitsotakis mırle; İ aykanoyuthathe layba dımdawmo bu şıkılano, cal dhawyo şwolo du qento du hulmono u di mşaynutho athronoyto. U rişwazire wu waziro di galwoyutho thımlın a galwoye, bu tewqido di maşrithathe bıthır mıd mahti bu karanten, bıthır mıd magle dkito hol 35 farsufe kayiwe bi Corona.

U Yawnan kımfaşıq u yuqdonano d’Moria xıd fırsa, leşan dsoxarla. Cali sbuthathe d’Lesbos’ste Almanya sımwola qroyto lan athrawotho hadome du Huyodo d’Urifi dmaydi galwoye mi maşrithathe d’Moria. Norweç mawdacle dkıtyo hadiro dmoyıd 50 galwoye wu Swed’ste kmıntır dmoyıd u şwolano li ido.