Uqrobo Beyn Armenya u d’Azerbeijan bqaşyutho kımdawım

U qrobo bayn da haylawotho d’Armenya u d’Azerbeijan bu qlimo şaryo d’Nagorno Qarabax b’qaşyutho heş kımdawım.

 Yerivan dmawdacla dıqtil zıd me 80 jatawiye Suriye b’Azerbejan, ucdoste u mawtbo di mşaynutho d’Emwotho Mhaydotho kdorış i sbutho d’Nagorno Qarabax, u kmıntır dforıs buyono bu huthomo du knuşyayde.

 Armenya u Azerbejan adyawma bi maqırhonutho dhulın, mawdaclın dıfrıslın topat yaqure bu taro du qrobo dkımdawım baynothaye bu qlimo şaryo d’Nagorno Qarabax. Ba nesore dhawilan cam mabuco folitiqoyo mu athro d’Armenya, mawdacle da hayalwotho d’Yerivan qtilın ba tıre yawme dşaficina 81 farsufe mbayn 5 alfo jatawiye Suriye dımşadrila Turkiya laşan dmıştawtıfi lu qrobo cam Azerbejan. U mabucano mawdacleste dkito mowat mjarhe ma jatawiye dkımharbi mqabıl d’zuze.

U ajans d’İnter Fax mawdacle cal leşonıd du rişqutno d’Azerbejan İlham Caliyev dıqtil adyawma 10 mdinoye bıthır ma hjome dsımla Armenya ba topat. Bebzabno, i wazirutho du sutoro d’Azerbeijan mawdacla da hayalwotho d’Armenya ba hjome dsımlın mnaselın dmadıcri anarcotho dımvaycilın bi xasra da fenyotho d’Fıduli, Gıbrayil, Ağdam u Terter.

Megabo hreno, i wazirutho du sutoro d’Armenya mawdacla du qrobo mdawamle athmıl blalyo, wu gayso d’Nagorno Qarabax nafıq mqabıl da hjome dsimi cala xtute du qrobo. İ wazirutho Armınoyto mawdaclaste da haylawotho d’Azerbeijan sımlın hjomo cal grub folhoyo Armınoyo bi qastra d’Wardnis dıkrıhqo balhude kmo mile mu qlimo d’Nagorno Qarabax. Bebzabno, i wazirutho du sutoro d’Armenya mawdacla di nuro qadiho bıhdo radayto mdinoyto bıthır mdıhjim acla bıhdo tayisto Azerbejanoyto dılo pilot.

Ucdoste, u mawtbo di mşaynutho d’Emwotho Mhaydotho kdorış i sbutho d’Qarabax calu talab dhawilın anathrawotho d’Britanya, Beljika, Estunya, Fransa u Almanya. Bu huthomo du knuşyano, kmıntır dmıfrıs buyono mu mawtbo di mşaynutho, elo ida dlımte l’awyutho bi sbutho d’Qarabax, i naqlayo anatharwotho Urifoye dkıtne hadome bu mawtbo di mşaynutho gıdfırsi buyono dkımmathıl hınne balhude.

Mxasra hreto, tıre jatawiye ma grube mzayne d’Suriya dıkmısnodi me Anqara, mawdaclın dı Turkiya kımşadro mharbone mi saqıbloyutho d’Suriya, laşan dsındi Azerbeijan dkıtyo i sagiyutho da camayda Maşılmono mqabıl du athro d’Armenya.

Atre jatawiyani dımşadri l’Azerbeijan baynothaye ha dmawdacle l’Reuters dhuwe latwole mabco dızze l’Azerbeijan, elo cal dkıtyo faqiro maqbele u medano mqabıl d’1500 dolare kul yarho.