Uqyomo beyn d’Boğdot u d’Arbil dfoyıt la haye gnofıq qrobo b’Şigor

U rişono gawonoyo da Haylawotho du Delqublo d’Şigor-YBŞ Hasso İbrahim mawdacle ilo thnihuthayde calu qyomo dhawi beyn Boğdod u Arbil bi sbutho d’Şigor u mırle; Kibe naqla hreto dnofıq qrobo b’Şigor, en u qyomano dmitafıt la haye.

 Hasso İbrahim dmawdacle, da Ezidoye lo kubci ducri lu şıkıl du zabno du qrobo dkıtwo ba 2014 u mırle; Kısaymina qroyto la 2 şultonwotho dılo mtabqi u qyomano.

Bı maqıblonutho dsimo camu rişono gawonoyo da Haylawotho du Delqublo d’Şigor-YBŞ Hasso İbrahim mawdacle ilo thnihuthayde calu qyomo dhawi beyn Boğdod u Arbil bi sbutho d’Şigor u mırle; Kibe naqla hreto dnofıq qrobo b’Şigor, en u qyomano dmitafıt la haye. A Ezidoye lo kubci ducri lu şıkıl du zabno du qrobo dkıtwo ba 2014, calathe kısaymina qroyto la 2 şultonwotho dılo mtabqi u qyomano.

İbrahim dkıtyoste ha ma rişone di Mdabronutho yothoyto d’Şigor mırleste; Noşo tro lo toce, di şultonutho d’Boğdod u d’Arbilwın dmaslamwolın Şigor l’Dacış dılo qrobo wu gerila di PKK u YBŞ  mdafacwolın u camo u maxlaswolın i fnitho midothe da marhıbone. Şigor kıfayşo bu qlimo bu garbyo du Iraq, dkito saqıbloyutho acle beyn di şultonutho d’Boğdod udi şultonutho d’Arbil du qlimo d’Kurdistan. U camo Ezidoyo jbırwo dmahzım ma dukothayde bu zabno dkbışwole u tukoso marhıbono d’Dacış i fnitho u dsımwole qtolğenso cala came di hiğmonutho d’Ninve.

Şigor mharırowa me hayle frişe; beynothaye YBŞ wu gerilla di PKK dımcadarwole ban alfayo d’Ezidoye dfayşiwo bu turo d’Şigor ba 2014. İ fnithathe mafitowa ba 2017 lu duyoqo du gayso Iraqoyo bıthır mu funcomo di şaryutho dsımwo bu qlimo d’Kurdistan u 9 bu yarho dşafıcina, mıtafqiwo a 2 şultonwotho cal qyomo bu haqlo di mdabronutho u di mşaynutho di fnithathe.

Awkith i mşaynutho di fnitho bu duyoqo di şultonutho federaloyto gıdhowe wa powelıs Iraqoye gıdsaymi u duyoqayda wa hayle folhoye hrene kule, klozım dtorın mi fnitho. Bu tarano, mşadarwola Boğdod ban alfayo d’pwelıs li fnitho leşan dımamni a thume. Elo ba tebe haroye dıfrisi kımawdıc, dımşadır hayle Turkmanoye sanode l’Turkiya li fnitho u hani kımşakli qento li ithutho da Ezidoye.