27/04/2022

USCIRF frisle u taşrorayde di şato da 2022 cali hirutho da tawdiyoto b’athrawotho frişe dbritho

U Komisyon Amerikoyo di Hirutho Emwothoyto da Tawdiyotho, frısle u taşrorayde di şato da 2022, cali aykanoyutho di hirutho tawdiyoto b’athrawotho frişe dbritho. Bu falqo du taşrorano dcal Suriya, u Komisyon mahkele cala dyoşe sistematik dıksaymo Turkiya cali hirutho tawdithoyto b’Suriya u grışla u zuhoro cala tlotho Mharbone du Mawtbo Folhoyo Suryoyo dhkimi cımraye kule lu hbuşyo b’Turkiya.

27/04/2022

U Komisyon Amerikoyo di Hirutho Emwothoyto da Tawdiyotho, kımaslım kull şato i netiçe da buhonayde dcali Hirutho tawdithoyto b’athrawotho frişe dbritho li wazirutho di baroyutho d’Amerika. U taşrorano’ste dkıtyo qariwo l’100 fothotho, bşıkıl rwiho kımahke cali aykanoyutho dkull athro bu haqlo da zedqe noşoye, bu cnufyo uba rdufye, cali aykanoyutho da qalilotho dıkhoyın bu athro uğer sebwotho.

Bu falqo du taşroro du komisyonano dkıtyo bi rişonutho d’Nadine Maenza dfris cal Suriya mawdıc, dkito ğamo rabo calu athrano bu haqlo da dyoşe udu cnufyo bu haqlo di hirutho tawdithoyto, a tedbire dmahti cali şultonutho du rejim bi sbuthathe. Bebzabno griş u zuhoro cala hbose dsimi cal Turkiya, dmıgroşo ma dukotho dkbişila b’Suriya wu cnufyo dıkmdawmo dmaşyo Ankara cama marhıbone noqufayda calu garbay madınho d’Suriya.

Bebzabno mahke cali Mdabronutho yothoyto wu snodo d’Amerika lu şuşoto da dukotho dkıtne bu duyoqo di Mdabronuthathe-dıkmaşyo tahrazyotho lu şeçoco di şawyutho du ğenso, di hirutho tawdithoyto la came frişe dıkhoyın bu qlimano; beynothaye Suryoye Othuroye Kaldoye, Armınoye, Ezidoye, Kurdoye, Caraboye uğer. A hayle da came frişe du qlimano’ste mşakelın a Haylawotho d’Suriya Demoqratoyto dhuwlın ağono caşino camu koalisyon Emwothoyo mqabıl du tukoso marhıbono d’Dacış udu nişayde du qşoco da came etnikoyo du qlimo.

Bu taşrorano u komisyon frışle duktho rwıhto cala hçome dıksaymo Turkiya wa noqufayda wu husrono dkobın la qalilotho-dilonoyith a hçome dsimi cala qıryawotho da Mşihoye b’Tel Temır u jbırlın mınyono celoyo d’comure dmahzımi ma dukothathe a şerşoye. Bu dumyano, Turkiya thımla’ste a Mşihoye bu snodo di marhıbonutho u hkımla 3 ma Mharbone d’MFS cımraye kule lu hbuşyo. A 3 Mharbonani, hın ma 300 bnaymothoye d’Suriya dımsiki b’Rişcayno’ne-bıthır mıd Turkiya kbışwola i fnitho ba 2019.