26/04/2021

USCİRF mhanele Joe Biden dmawdele bu qtolğenso da Armınoye

U Komisyon Amerikoyo di Hirutho Emwothoyto da Tawdiyotho, frısle egartho u mqadamle a tahınyothayde lu fusqono makthabzabnoyo dmıdle u rişono Joe Biden bi sbutho di mawdyonutho bu qtolğenso dan Armınoye.

Bi egarthathe u Komisyon Amerikoyo kımthakır’ste u qtolğenso dsim calu camaydan ucala Yawnoye bcayni eşne du qtolğenso dan Armınoye.

U Komisyon Amerikoyo di Hirutho Emwothoyto da Tawdiyotho b’fsihutho mıstaqbele i mawdyonutho bu qtolğenso dan Armınoye dsim bu yawmo du duxrono şatonoyo da 106 eşnayde. Mawdıc bu yarho dıbqamuthayna, u Komisyon gıdhowele droşo cami şultonutho d’Amerika calu fusqonano du qtolğenso wi dawse dıklozım Woşington dımhalqo bıthır mucdo.

Bi egarthathe u Komisyon mahkele aydarbo mşarele u qtolğenso sistematik dsim cal zıd me milyon d’Armınoye ban 1915 mi mamlaxtho da Cuthmanoye. mawdıc, di mawdyonutho di şultonutho d’Biden bu qtolğenso dan Armınoye, dawse ğalabe ulsoyto’yo lu yulfono di şrorutho dcalu kyono da hawbani.

İ rişonitho du Komisyon Gayle Manchin mırla’ste; U Qusro Heworo’ste bu şıkılano, kmıştawtıf xıdi kongre bi mawdyonutho da hawbani dkıtne qtolğenso dban milyone d’Armınoye u acmaye’ste Yawnoye u Suryoye Othuroye Kaldoyo Oromoye uğer qalilotho etnikoye.

Manuchin mırla; A camani kulle, qtiliwo ba eşne haroye di mamlaxtho da Cuthmanoye. Bu zabno dıkmathkırina a haye da bnaynoşo dqtiliwo bu qtolğensano, kımawdena’ste bu ağono ubu mrodo dhuwlın a Sohude wa nubğe da dıbhani dlo batlo ubi harayto’ste, m’aydla u snıdla Amerika i xasra trısto du makthabzabnano u catumano.

U mcadrono di rişonitho du Komisyon Amerikoyo Tony Perkins bu mamlo dsımle mırle; Bu zabno dkıtlan sabro di mawdyonuthathe dqudro dobo funoyo lan Armınoye b’britho, kıtlan’ste sabro da came kulle dmafiti bhawxa gunhe barbroye, dqudri dmaşmıci qolaye u dkolına camhıdode mqabıl da hayle dıksaymi a hawbani mqabıl di noşutho.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…