Walid Fares komer lo, lu groşo du zayno me QASAD. Bebzabno: u sistem federal kibe dmitarku b’Suriya

WASHINGTON — Bu funoyo dhule calu şuwolo dmın klayto kıtla Amerika mi qroyto dsımle Tomas Barrak bi sbutho dmıgrış u zayno ma haylawotho d’QASAD udhowın falqo ma şutose dı Darımsuq, u mşawrono dmeqım du rişono d’Amerika Walid Fares mırle;

“kmıtyaqanno di sagiyutho Amerikoyto b’şıkıl basit u qriho krıfdo dmıgrış u zayno d’QASAD ida dlımitathbıt dkito sistem mgawno u mşayno dıkmıştawtıfile a’came kulle, wu medano heş lımşarır mi xasra du ray gawonoyo d’Amerika. Kito hın ma falqe du ray gawonoyo d’Amerika dkıtne bu şerşo mu madınho mescoyo xda Yudoye uxda Mşihoye dıkzayci cala qalilwotho, kımqadmi l’QASAD xıd noqufo u şoriko. İda dkito şuhlofe dgıdhowın bu athro d’Suriya i hathto gıdmıdroşo i sbuthathe b’Amerika. Elo hul ucdo lışamıcno dkito droşo calu medano lo bu tboco froso uloste bi kongre d’Amerika, inaqlayo meqım mitawmır cal Amerika dkıtla tarmitho bi sbutho d’Suriya, klozım dmıdrış u medano b’şıkıl rabo b’gawıd di kongre”. 

Calu şuwolo di klayto qrihto dkıtla Amerika bi sbutho du sistem federaloyo b’Suriya, Walid Fares bi maqıblonutho dsımla acme i şabake d’Rodaw mırle;

“bi sbutho di federaliye latyo mede dlaybe dhowe b’Suriya. Meqım mathe Amerika sındwola Kosovo, Bosna, Taymur i madınhoyto wu taymno du Sudan. İnaqlayo kito biholo fulhono qonunoyo u siyasi d’Amerika dıkmaqbıl a’talabe dmibayın u dactid u qadar da came bu sebyonaththe. Lıkızzi l’rahuqo ğalabe, u sistem d’Amerika ste federaloyo yo. İnaqlayo mınyo i celtho dıkmitawmır di federaliye layba dmişarrıro b’Suriya. İda dkito duktho bu madınho mescoyo dıklozım i federaliye dmitarkıwo ebe Suriya, u Ciraq, Lebnon wu Sudan yo”.