Waziro di baroyutho d’Suriya Alşibani hawile ytawyotho qamoye b’Mosko

MOSKO — I dayira du tboco froso di wazirutho di baroyutho d’Suriya bu buyono dıfrısla, mawdacla du rişqutno Putin bi ytawto dhawile athmıl camu waziro Alşebani bı Mosko, mawdacle d’Rusya krıfdo kulonoyith kul şıkıl d’mudaxala İsarloyto aw nesyune du floğo d’Suriya, u mathkarle ste di şultonutho d’Mosko b’fusqono kamiloyo dsındo a’fulhone du bnoyo u hethotho d’Suriya wu maşıqlo du terkiwo di mşaynuthayda. 

M’gabo hreno, Alşebani bi ytawtayde cam Putin makdle u mabco dkıtla Suriya dımtarso an’esore dcam Rusya cal asase hathe dıksaymi u garanti du yuthrono du camo d’Suriya, udıkfıtho u darbo b’qamuthıd d’şawtofutho dhuyo b’dangat bayn dı Darımsuq u Mosko. 

Bebzabno, Alşebani makadle di şultonutho dı Darımsuq b’fusqono kamiloyo dsaymo u sutoro da came kulle du athro, udımtarso i yortutho dıtrele u rejim catiqo du Bacıth bu haqlo folitiqoyo u şerşoyo b’şıkıl dkımşabıl u dactid du athro d’Suriya. 

Mxasra hreto, u waziro di baroyutho d’Rusya Sergey Lavrov bu knuşyo mşawtfo dhawile lu tboco froso camu baramnayde d’Suriya Alşebani, mahwele i klayto dkıtla Mosko bi sbutho da came qalile d’Suriya, uda guboye gawonoye du parlamento dıkmıntır dmisomi bu yarho d’İlıl dıbqamuthayna, u mırle “menkulfrus kıbcina dhowın a’guboye d’Suriya maltımone, awkith dmitahwe aftho la came umthoye u tawdithoye kulle dmıştawtıfi bu şekolo da şutose ruşmoye hathe d’Suriya”. 

Lavrov grışle ste u zuhoro cali sbutho Kurdoyto u mırle “drışlan an’esore bayn Darımsuq wa grube Kurdoye. Menkulfrus kıbcina dhowın a’Kurdoye morıd d’zedqe kamile bu kenşo d’Suriya ub’gawıd d’athro mhaydo”. 

Alşebani ste bu mamlo dsımle, mawdacle d’Suriya kıbco dmaqimo esore towe cam Rusya, ukıbco ste dhuyo Mosko sanıdto l’Darımsuq.