Wazirutho da galwoye d’Lebnon: “u zayno d’Hizballa lıssımle u sutoro d’Lebnon, elo shıfle”

BEIRUT — U waziro da galwoye d’Lebnon Kamal Ş(h)ade mawdacle di şultonutho lıgıdmanhıto katfo mu fusqonayda bi sbutho dhowe u zayno balhude masro acma. Şhade bi maqıblonutho dsımle acme u froshezwo d’Alcarabiya bi mditho d’Bayrut mırle ste “u zayno d’Hizballa lıssımle u sutoro d’Lebnon, elo shıfle”. 

Bebzabno, Şhade makadle du sutoro d’Lebnon bu darbo du deblomasi kmisım, uba melani mdawamle “Hizballa mcanatle bi sbutho du zaynayde, wu medano lamtele camruhe netiçe msimonitho. Elo heş kito aftho dmisım debloamsi bi sbuthathe”. 

I maqırhonuthathe d’Şhade athyo luhwoyo bıthır mıdmabuce du froshezwo d’Alcarabiya mawdacwolın meqım du gefo folhoyo d’Hizballa hule xabro lu rişono du parlamento d’Lebnon Nabih Bırri dhuwe lıgıdmaslım u zaynayde hatta law dmıgroşo İsroyel mu taymno d’Lebnon. Hizballa mawdacwole ste dkıtyo hadiro dhowe dalqublo di şultonutho d’Lebnon ida dhiya dıbco u medano. 

Camgabıdathe, a’mabuce du froshezwo d’Alcarabiya mathkarlın du mathlono Amerikoyo b’Lebnon Tomas Barrack tlıble dmibayın tahrazto zabnoyto laşan d’Hizballa dmaslım u zaynayde bı maşıqle dgıdtaymi bu yarho dı Tışrın u Qadmoyo dıbqamuthayna xıd zabno haroyo. Bebzabno, Alcarabiya mathkarle du funoyo dınqile Hizballa l’Barrack bu darbo d’Nabih Bırri mrimono we. Barrack mırle ste la mşale Lebnonoye “u zabno kul dkothe ktoyım b’qamuthayxu”.  

Cayni mabuce maglelın ste liholo d’Hizballa lıkobıc dmaslım u zaynayde, uktolıb dmitahwele garantiye bi sbuthathe, ukmasır i sbutho du zaynayde bu mede dhawi b’Sweda bu taymno d’Suriya ba zabne haroyani.