Yadicthone simlen qroyto lu athro du Yawnan di mawdyo bu Sayfo d’1915

ATHENA – Meqım şabtho mtayabwo lumodo Emwothoyo b’Athena du Yawnan cala 110 eşne du qtolğenso mayiro dsımwola i mamlaxtho da Cuthmanoye cala 3 came Mşihoye bu zabno du qrobo qamoyo dbritho. Lu lumodano’ste hadırwo mınyono celoyo d’yadıcthone du makthabzabno uğer yadıcthone dcala qtolğense. Bu lumodano, a hadire sımwolın mamle frişe cala celotho ucali netiçe du qtolğenso wu tathir dıktoryo i siyase du tenkiro d’Turkiya cala came dmafiti bu gunhano u barbroyo.

A yadıcthone dhadiri u lumdano u acmaye’ste u mşalo du Huyodo Othuroyo bu Yawnan Kyriyaqus Batsaras sımlın qroyto li şultonutho du Yawnan, dmawdıyo ruşmoyith bu qtolğenso dsımwo calu camaydan. İ dafo d’European Conservative sımla maqıblonutho cam Batsaras dmahkele cali ulsoyutho dkito lu camaydan, d’Athena dmawdıyo bu qtolğenso dsim acle.

Bu dumyano’ste, gıdhowe u Yawnan ha ma athrawotho du Huyodo d’Urifi dmawdele ruşmoyith u Sayfo dsımwo calu camaydan. Bebzabno mahke bi mimarthathe calu camaydan dkıtyo camo şerşo bu Cıraq, b’Turkiya, Suriya u İran u aydarbo mafıt bıgawe du makthabzabnayde kule b’qtolcame frişe. Camathe’ste mahke cala qtolcame dsimi man 1840 uholucdo.

Dr Anahit Khosroeva dkıtyo professor bi bethsawbo d’Harvard mırla li dafo; İ mawdyonutho du Yawnan bu qtolğenso du camaydan u dan Armınoye kıtle ulsoyutho hem du moral du makthabzabno, di siyase u hemste bu haqlo diplomatiqo-awkith a 3 camani, me cayni rejim qtili. İ mawdoyutho bu Sayfo dawse di awyutho u mşalutho etnikoyto’yo. Bu lumodano, friş’ste duktho rwıhto calu makthabzabno catiqo du camaydan d’Bethnahrin.