Zuhoro l’İsroyel dlo mabdiyo cuqobo cal Ğaza

GAZA/URISHLEM — U makıthbo du rişwazire d’İsroyel Bınyamen Netanyaho bu buyono dıfrısle athmıl, mawdacle d’Netanyaho hule amro dmitakre u zabno du maşıqlo du kboşo da nuqazyotho dfayışlene u zawco marıhbono d’Hamas bi mditho d’Ğaza, bu zabno dkımtayıb ruhe u gayso dmabde cuqobe rwihe laşan du kboşo di mditho. U malolo du gayso d’İsroyel Evi Devrin bi maqırhonutho dhule, mawdacle du gayso mhalaqle a’dawsat qamoye du kboşo d’Ğaza bıthır ma taxtuşe dhawile cam mharbone mu zawco d’Hamas bu taymno d’Xan Yunıs. 

Devrin mırle ste “u agyso İsarloyo gıdmqaşe u hçomayde cal Hamas bi mditho d’Ğaza dkıtyo i nuqazto folhoyto du tukoso marıhbono. A’haylawothaydan mşarelın dımtawqi a’tarafe di mditho d’Ğaza, u Hamas mşahlıf ucdo l’haylo mhilo d’maysaryotho awkith haylo da zabuqone. Mşarele ucdo u maşıqlo qamoyo du hçomo cali mditho d’Ğaza, wa haylawotho İsarloye kbışlın ucdo a’thume di dmitho”. 

Camgabıdathe, u froshezwo İsarloyo da 12 mawdacle du waziro da sebwotho stratijikoye Ron Dermer qtırle knuşyo bı Paris cam mşale b’darğo celoyo mu athro d’Qatar, bnişo dmıdroşi a’fulhone du qyomo di şalyuthzayno udu terfiyo da yasire İsarloye. Lfuth i dafo d’Axiyos, Dermer bu knuşyano makadle du terfiyo da İsarloye dmidi yasire mu zawco d’Hamas, kımmathıl şart asasi laşan dayna qyomo dhowe di şalyuthzayno. 

Mxasra hreto, u notarrozo gawonoyo d’Emwotho Mhaydotho Antonio Guteres sımle adyawma qroyto d’baroyo dmitaklın a’taxtuşe bu xtuto d’Ğaza, bnişo dmınfıq mqabıl da qatle udu shofo rabo dkibe dhowe li mditho, bıthır mıdmawdacla İsroyel dımşarela bu maşıqlo qamoyo du kboşo d’Ğaza.