14 folhe turkoye qtili ba cuqobe du Iraq

Mınyono d’radoyotho folhoye d’Turkiya, cabiri ma thume d’Suriya lıgawe du qlimo du garbyo du Iraq. Bu konvoyano, mawdıc dkıtwo mınyono dfolhe dilonoye du gayso Turkoyo.

 Me gabo hreno kmitawdıc, ba taxtuşe dhawın ba yawme haroyani beyn du gayso Turkoyo udu gerilla di PKK bı dukotho frişe d’Haftanin du Iraq, qtil hol 14 folhe Turkoye.

A hayle du rişqutno Turkoyo Recep Tayyip Erdoğan, kımdawmi a cuqobathe calu gerilla di PKK bu garbyo du Iraq. Lfuth a tebe haroye dıfrisi cala cuqobe dıksaymi a hayle kaboşe d’Turkiya bı dukotho frişe du garbyo du Iraq, i şultonutho d’Ankara mşadarla konvoy hreno dfolhe xıd taqwiya, la hayle Turkoye dkıtne ba nuqazyothathe d’Zaxo.

Bi mawdconutho dıfrıslın a Haylawotho du Sutoro du Camo-HPG’ste makadlın, ba cuqobe dsımle u gerilla cala hayle Turkoye dkıtne b’Haftanin, Xakure u Çele du garbyo du Iraq, qtilın 10 folhe Turkoye. Meqım yawmoste, qtiwole u gerilla 4 folhe Turkoye bı dukotho frişe du qlimo.

Athmılste a comure dı qritho hreto b’Zaxo jbiri dmaxlın i qrithathe mcal fothe da hjome uda taxtuşe dkımdawmi bi fnitho. A comure di qritho d’Avla krıhlın a hjomani d’Turkiya u mırlın; Lo kıfuhmina, qay Turkiya hjımla cali qrithaydan. Ahna belhude cayşinawo bi qrithathe u latwo u lo ha gerilla eba.

A cuqobani di hawa udi naşfe du gayso kaboşo d’Turkiya cal dukotho frişe du qlimo d’Kurdistan, mşarewolın bfalge du yarho dı şafıcina u qtilın ba hjomani holucdo 5 mdinoye. Bı ğalabe ma dukotho dıkmuhyo Turkiyaste, kito qıryawotho du camaydan dhzelın husrono rabo ma cuqobani dıkmahrıwi a mulkone da comure.